TURA: Assam aro Meghalaya a·dokni simarango ong·enggipa golmalrangko namatna gita ja·ku de·anio Meghalaya a·dokni ning·o donggipa mitam A·chikrang songrangko Assam-o napatna dolgni sorkarirangni tik ka·aniko Association for Democracy & Empowerment (ADE) jegalatenba, ia songrango donggipa manderangni namgnina ia songrangko Meghalaya a·dok ning·on donchina Assam aro Meghalaya sorkarirangko didiataha.
ADE-ni president Dalseng Bira Ch Momin-ni parakatani gitade, Assam a·doko napatna tik ka·enggipa Malchapara aro Salbari songrangara chengonin West Khasi Hills a·jani Nonglang rajani ning·o donggipa songrangsa ong·a aro ia songni manderang skangonin Meghalaya a·dokni Election ID card-ko jakkalgiparang, MeECL-ni bijoliko jakkalgiparang, MBOSE-ni ning·o on·enggipa lekka porako man·enggiparang aro Meghalaya sorkarini ning·on kamko ka·e cha·paenggipa manderangsa ong·ani gimin ia songrangko da·o Assam a·doko napataniara dolgni sorkarirangni dal·bea gualaniko dakanisa ong·engachim.
“A·dok damgnini simarango meligrikgijanirangko namatna ja·ku de·enganina chinga a·dok damgnini sorkarirangko mittelpilna ska indiba iandake songni manderang baksa agangrikchenggija ja·ku de·aniko maming dakeba ra·chakna man·jawa. Ia ja·kuko de·anichi neng·nikanirangko man·na sienggipa manderangde ia songni manderangsa ong·gen, uni gimin ia songrangko Assam-o napatna skang, songni manderang baksa agangrikchenge uamangni nangnikanirangko ra·china chinga nangnikenga,” ine Momin parakataha.
Simarango meligrikgijaniko namatna gita a·dok damgnini soi ka·grikgipa Memorandum of Understanding (MoU)-ko jinmana parakchina didiangengon, ia kamo mongsonggipa manderang ba dolrangde simarang songdongenggipa manderangsa ong·ani gimin pilak kamrangon songni manderang baksa agangrikchengna aro talatanirangko on·chengna nanga ine ADE-ni president parakataha.
“Ia songrango songdongenggipa ritchani ritcha manderang baksa ADE-ba ku·rangko on·paengon, ia songrangko Assam-o napatna tik ka·aniko ra·pilchina aro ia songrangkoba Meghalaya a·dok ning·on dongna on·kuchina chinga mol·molenga,” ine Momin parakataha.