TURA: Garo Hills Autonomous District Council (GHADC) election-rango gipin jatrangni bak ra·paenganiko champengna gita dingtang electoral roll-ko jakkalchina dingtang dingtang dolrang dabitokengani gimin Mongolbar salo, GHADC-ni opposition MDC-rang, iani bidingo da·o ong·enggipa GHADC-ni session-o chanchirimna gita ra·baon opposition MDC-rangni motion-ko NPP-chi dilenggipa Executive Committee jegalataha.
GHADC election-rango gipin jatrang aro mongsongbate Tribal ong·gijagipa manderang bak ra·pana man·jana gita Garo Hills-ni dingtang dingtang dolrang, batanggimin bilsirangonin dingtang electoral roll-rangko tarie jakkalchina dabitokengachim ine nikna man·a.
Iani bidingo GHADC-ni session-o chanchirimna ra·baaniko Executive Committee-ni jegalsoahani gimin Rongrong constituency-ni MDC Rinaldo K Sangma, an·tangni suk ong·gijaniko parakatengon, GHADC-ni A·chik MDC sakantian district council-o gipin jatrangni bak ra·aniko jegalna gita an·tangtangni constituency-ni manderangna ku·mikchetesa re·baaha indiba iani bidingo chanchirimna ra·baon GHADC-ni Chief Executive Membor aro Deputy CEM-ni dilanichi ia motion-ko jegalsoaha ine parakataha.
“Ian bilongen dukni katta ong·a maina da·on an·ching ja·ku de·samsojaode mikkangchi jatna dal·a gimaani ong·gen. Ian A·chik jatni namgnina aro an·chingni dedrang su·drangrangna niksamsoe ja·ku de·anisa ong·achim. GHADC-o dingtang electoral roll-ko tarina nangchongmota,” ine Sangma parakataha.
GHADC-o gipin jatrangni bak ra·paaniko champengna gita dingtang electoral roll-ko tariani bidingo chanchirimna gita motion-ko Opposition MDC-rangoni saksa Alphonsush R Marak soi ka·enba, GHADC-ni Chairman-na on·ahachim ine nikna man·a.