Ganol chibisikko tangatpilna PES-ni Pilot Project-ko CM a·bachengate on·anga

TURA: Ganol chibisikko tangatpilna gita gong kror 1.20 ong·gipa Payment for Ecosystem Services (PES)-ni Pilot Project-ko Sonibar salo, a·dokni Chief Minister Conrad K Sangma, Asanang-o a·bachengate on·angaha.
Ia apsan somoion FOCUS program-ni ning·o ua producer group-rangnaba cheque-rangko suale on·angjolaha aro ia tom·anio Chief Minister-ni Adviser Thomas A Sangma, a·dok sorkarini Chief Whip Marcuise N Marak, West Garo Hills a·jani Deputy Commissioner Ram Singh aro dingtang dingtang officer-rangba dongpae bak ra·angaha.
Ia project-ko a·bachengate on·angani somoio a·dokni Chief Minister, jinmana aganprakangengon, ia sal somoirango buring bolgrimrang porongrong ong·roroangenganichi chiring chibisikrang tiproroangengaha aro manderang chu·onga gita chirangko man·tokjaengaha ine an·tangni suk ong·gijaniko parakangaha.
Ia sal somoirango climate-rang dingtangrorobaengaha aro janggi tangani cholrangba komiroroengaha ine janapatengon, iandakgipa obostako chagrongna nangengani giminsa sorkari, ia pilak neng·nikanirangko namatna man·na gita PES-na program-ko tariaha ine Chief Minister parakataha.
“Ia project-ni ning·o sorkari, manderangna dingtang dingtang kamrangni gimin agan-talate on·asan ong·agija an·tangtangni janggi tanganio neng·nikanirangko namatna tangka paisani gitaba dakchakanirangko on·enga,” ine Sangma aganaha.
Meghalaya a·doko 4200 square kilometre catchment area ba chibisikrangko ong·katatna miksongenga ine janapatengon, manderangni janggi tanganiko namdapatna gita dingtang dingtang department-rangchi pilak nanga dakchakanirangko on·anggen ine Chief Minister parakataha.
Ia tom·anio Chief Minister-ni Adviser Thomas A Sangma-ba dongpae jinmana aganprakengon, ia nambegipa project-ko a·bachengatahani gimin chief minister-ko mittelpilangenba, ia pilot project-ko chu·sokgipa ong·atna manderangkoba bakrime kam ka·china didiangaha.
A·dok sorkarini Chief Whip Marcuise Marak-ba ia tom·anio jinmana aganprakengon, Ganol chibimao jokbraegipa pilak chibisikrangkon tange rakkichina aro samtangtango ong·telaigiparangko tangatpilna kam ka·anio sorkari baksa bakrimchina gita manderangko didiangaha.

Get real time updates directly on your device, subscribe now.

Comments are closed.