TURA: Assam aro Meghalaya a·dokni simarango ong·enggipa golmalrangko namatna gita a·dok damgnini Memorandum of Understanding (MoU)-o soi ka·grikanichi, Meghalaya a·dok ning·o ga·akgipa bang·a A·chik songrangkon Assam-o napatenganina All Khasi Hills A·chik Federation (AKHAF) jegalatenba, ia songrango songdongenggipa A·chik manderangni namgnina ia MoU-ko ra·pilchina gita a·dokni Chief Minister Conrad K Sangma-ko didiangaha.
“Re·anggipa March-ni 29 tariko dolgni sorkarirangni soi ka·grikgipa MoU-ko chinga raken jegalenga maina a·dok damgnini soi ka·grikanio, Meghalaya a·dok ning·o ga·akgipa Hahim, Salbari, Malchapara aro uandakgipa gimik dam 15 songrangko Assam-o napatna siengaha. Ia songrangko Assam-o napatahaode ia songrango donggipa A·chikrang namen neng·nikanirangko chagrongna nangtokgnok. Uni gimin chinga ia MoU-ko ra·pilchina Meghalaya Chief Minister-ko didienga,” ine AKHAF-ni publicity secretary Sanggra Marak parakataha.
A·dok damgnini simarango ong·enggipa golmalrangko on·sregrikani bewalo namatna kam ka·engani gimin a·dok damgnini sorkarirangko jegalatengon, ia ‘on·sregrikaniba’ ong·jaengaha maina Meghalaya a·dokonisa bang·a songrang Assam-o napangenga indiba Assam-oni Meghalaya a·dokona napbaenggiparang dongskajaenga ine AKHAF-ni dilgiparang matnangataha.
“Uni gimin sima jolrango songdongenggipa manderangna chu·ongnikaniko ra·bana man·na gita Chief Minister aro gipin dilgiparang, an·tangtangan ia songrangona re·ange kakketko am·sandichengna nanga, unosa kamrangko nambate chu·sokatna man·gen,” ine Marak parakataha.