M’laya-o mikka balwa ta·rakanga

SHILLONG: Re·anggipa Budbar walonin Meghalaya a·dokni dingtang dingtang biaprango mikka balwa ta·rakangan baksana stilrangba ga·akangaha aro uandaken a·dokni badiaba badiaba bakrangode nok-jamrang nosto ka·ako man·angan baksana bol wa·arangba bang·en be·aha.
Koborko on·ani gitade, Bristibar salo mikka balwa ta·rakani Ri Bhoi aro East Khasi Hills a·jarango bilongbatangaha aro balwarang ta·rakbee balangani a·sel ia jolrango bang·en nok-jamrang nosto ka·ako man·angaha aro bolrangba bang·en pangpikatako man·tokaha.
Budbar walonin mikkarang dontonggija waangaha aro mikka baksana ta·rakbegipa balwarang aro stilrangba ga·akchapahachim.
Official-rangni u·iatani gitade, mikka balwa ta·rakanganichi Ri Bhoi a·jani Umsning, Bhoirymbong aro Umroi jolrango nangchakeaniko man·bataha.
Ia jolrango stilrang jimbee ga·akanichi garirangba bang·en nosto ka·ako man·tokaha aro Shillong bypass-o garirangni apchangket ong·anirangkoba nikna man·aha.
Bristibar salo, Shillong songjinmani mitam bakrangoba balwa ta·rakanirangko nikna man·aha indiba maming dal·a a·sel ong·anirangkode kobor man·jaha.
Indake ong·engon, Garo Hills-oba Budbar walonin dontonggija mikka balwa ta·rakangaha aro badiaba badiaba biaprangode nok-jamrang nosto ka·ako man·an baksana bagan barirangba nosto ka·ako man·tokaha.
Mikka balwa ta·rakanganichi badiaba badiaba biaprangode bijoli krongrangba pe·ako man·aha aro uandaken Budbar walonin bijolirang sina a·bachengaha.
Ia koborko seatengmiting somoiona kingkingan Tura jillani mitam biaprangode bijoliko man·pilkujaengachim.