Assam, Langpih-o status quo-ko pe·enga: KSU

NONGSTOIN: Langpih-o ge·sa Disability/Mental Hospital-ko Assam sorkari rikdrana am·enga ingipani bidingo Khasi Student Union (KSU) mija Butbaro, West Khasi Hills Deputy Commissioner, P.D Sangma-ko grongenba talataniko bi·aha.
DC-ko grongani ja·mano koborni manderangna aganengon, West Khasi Hills-ni district administration-na maming u·iatani gri, Assam Sorkari, Langpih-o ge·sa disability/mental health hospital-ko rikdrana jotton ka·enga ine KSU President, John Fisher Nongsiang aganaha.
Ua indakeba aganaha je, Langpih sector-ni bidingo sima arini gimin mamingkoba agangrika dongkuja, unigimin Langpih sector-de da·oba golmal gnanggipa a·jaan ong·engkua unigimin status quo-ko rakkina nangkuenga.
Ua agandapkua, status quo-ni gitade, kajia golmal gnanggipa sima arini biaprango a·dok damgnichinian maming nokrik-nokdakanirangko dakna man·ja, aro dakgenchimoba uan a·dok damgnini deputy commissioner-rangni meligrikosa dakna gita man·a.
Indake ong·engon, kajia golmal gnanggipa biaprango, Assam sorkari jedakgipa nokrik nokdakani ba namdapatani kamrangko ka·genchimoba, Assam mamingsaloba  West Khasi Hills-ni district administration-na u·iatrongja ineba KSU dilgipa matnangaha.
“Uamangni indakgipa kamrangan, a·dok damgnini ku·mikchetgrikgipa status quo-ko Assam sorkari pe·enga ine mesoka” ua aganaha.
Unomitingo saksa Khasi Silamon Suwangre-ni Langpih-o nok rikna am·akoba Langpih sepango donggipa gipin jatrang champengaha ineba Union matnange aganaha.
Samgipinchi, Langpih sepangogipa Umthli songni matnange aganani gitade, Assam sorkari da·oba ua jolrango an·tangtangna sima arini krongrangkoba songroroenga.
Indake ong·engon, ia obostarangko nina gita ua magistrate saksako watatgen aro ua an·tangba Kamrup district deputy commissioner baksa agangrikgen ine WKH deputy commissioner P.D Sangma aganaha.