B’desh-ona ra·angenggipa churangko BSF rim·a

 

TURA: Re·anggipa Sonibar salo, Bangladesh a·songona niam gri ra·angenggipa te 1200 churangko, Border Security Force (BSF)-ni sipairang, West Garo Hills aro South Garo Hills a·jani simao rim·rikna gita man·aha.

BSF official-rangni u·iatani gitade, India a·songo tarigipa churangko Bangladesh a·songona ra·angenga ine koborko man·soenba, West Garo Hills aro South Garo Hills a·jani sima gita re·ruraenggipa manderangko BSF dolni sipairang nirikkina a·bachengataha aro uandaken ia jol gita Bangladesh a·songona niam gri ra·angenggipa te 1200 churangko rim·rikna man·aha.

“India a·songni simarango ong·gija dakgipa manderangni re·ruraanirangko aro ma·manti bosturangko niam gri badingsrukaniko champengna gita chinga chingni sipairangko nirokatenga aro iandakgipa kamrangko champengna jotton ka·enga. Batanggimin somoirangoba chinga iandake a·songni bosturangko gipin a·songrangona niam gri palsrukatanirangko bang·en rim·na man·aha aro ia changoba Bangladesh a·songona ra·angenggipa churangko rim·na man·aha,” ine BSF Meghalaya Frontier-ni official saksa parakataha.

Kobor on·timgiparangni u·iatani gitade, Bangladesh a·songo churangko dam rake palani gimin, niam gri bading chiwale cha·enggipa manderang, India a·songo tarigipa churangko Bangladesh a·songona ra·ange dam rakbate palna man·skaengachim.

Get real time updates directly on your device, subscribe now.

Comments are closed.