SHILLONG: Meghalaya a·doko All India Trinamool Congress (AITC) aro Congress dolgninade Prashant Kishore-chi dilenggipa IPAC dol kamko ka·na man·jawa ine Budbar salo, AITC-ni state president Charles Pyngrope parakataha.
Meghalaya a·dokko man·chape mikkang bilsio election ong·na sienggipa a·dokrangna kamrangko ka·sona gita All India Congress Committee (AICC)-ni interim president Sonia Gandhi-na pakwataha ine agangipa kattarangna Pyngrope, ia kattarangko aganskaaha.
“Meghalaya a·doko AITC dolnan IPAC team kamrangko ka·manahani gimin angni chanchiani gitade, uamang a·dokni Congress dolnade kamko ka·jawahakon,” ine AITC-ni state president aganaha.
Re·baenggipa 2023 bilsini Meghalaya Assembly election-na Congress dol baksa nangrime kam ka·aniko ua an·tangde ra·chakaia ineba Pyngrope parakattaiaha.
“Meghalaya a·doko election-na skang Congress dol baksa bakrimani bidingo name chanchie nipiltaina man·gen. Indiba iani bidingo AITC aro Congress dolni high command-rangsa tik ka·na nanggen,” ine Pyngrope aganaha.
Election-na skang Congress aro AITC bakrime kamko ka·sogenchimode seat-rangko sualgrikani giminba chanchina man·gen ineba AITC-ni state president parakataha.
Pyngrope-ni aganani gitade, BJP-ni miksonganirangko jegalenggipa dingtang dingtang political dolrangko bakrimchina AICC-ni interim president Sonia Gandhi-ni ja·ku de·aniara namen namgipa ong·aha.
“Apsan dake chanchigipa dolrang pilakan nangrime Parliament-o MP-rangko bikotani gimin chanchina nangenga. 2024 bilsio gital ma·mong sorkariko rikna gita Congress aro jolni dingtang dingtang dolrang apsan chanchirimna man·gen,” ine AITC-ni state president aganaha.
BJP-ko warachakna gita a·songni salgipeng jolo donggipa dingtang dingtang dolrangba iano bakrimna nanggen ineba Pyngrope parakataha.