RESUBELPARA: North Garo Hills a·jaoba Meghalaya a·dokni bilsi 50 gapaniko Budbar salo, Resubelpara Mini Stadium-o maniangaha aro ia manianio Meghalaya Legislative Assembly-ni Deputy Speaker aro Resubelpara-ni MLA Timothy D Shira, mongsonggipa sokgipa ong·e bakko ra·angaha.
Meghalaya Day-ko pangna bilsian January 21 tariko manirongengoba, COVID-19 sajinmani a·sel a·dokni bilsi 50 gapaniko North Garo Hills a·jao, April 27 tariko maniangskaaha.
Ia tom·bimonganiko ong·atanio Assembly-ni Deputy Speaker aro Resubelpara-ni MLA, jinmana aganprakangengon, a·dokko man·na krengdilanggipa pagitcham ma·gitchamrangko mittelpilangenba, uamangni an·tangtangko on·kange kamko ka·anichisa dingtang a·dokko man·aha aro ian uamangko mande ra·pilskana gita namgipa somoi ong·enga ine parakangaha.
Uamangni dingtang a·dokna krengdilaniko gisik ra·kamchina gita ia chasongni aro mikkang chasongni manderangko didiangengon, a·dokko namroro silroroatanio an·tangtangni daitoko ma·sigiparang ong·china ua, a·doko songdongenggipa mande sakantikon didiangaha.
Meghalaya a·dokko man·chengaoni da·alona kingking maidakgipa dingtanganirangko aro namroro silroroaniko nikna man·ahachim, uarangni giminba Shira, tom·anio bak ra·giparangna talate on·angaha.
Ia salo ua dingtangmancha DCIC-ni ong·atanggipa District Industrial Exhibition-koba oprake on·angjolaha. Ia exhibition-o dingtang dingtang department-rang aro jolo bading chiwale cha·enggipa manderang, jaktangtangchi tarigimin ma·manti bosturangko nina aro palna sim·na gita dam 17 stall-rango donangaha.
A·dokni bilsi 50 gapaniko manianio jatni kal·susaanirang aro Voice of North Garo Hills-ni final-koba ong·atangjolaha.
Bon·kamao, joltangni git ring·gipa dolrang, ia sal somoirango mingsing minggamako man·enggipa Monika aro Riprap dolba gitrangko ring·e manderangko an·saoatangaha.
