Chandigre-ona tarianggipa PMGSY ramako matchotgija galchipa ine FKJGP matnanga

WILLIAMNAGAR: Bilsiskuna skang, Oragitok-oni Sasatgre gita Chandigre-ona tariangenggipa PMGSY ramako da·onan matchotgija donchipenga ine FKJGP Nengkhra circle matnangatenba, ia ramako ta·raken matchote on·china ia ramako tarienggipa contractor-rangko didiataha.
FKJGP Nengkhra circle-ni president Tengkan Momin-ni parakatani gitade, ia PMGSY ramako bilsiskuna skangan tarina a·bachengahachim indiba ia ramako da·onan matchotate on·kujaengani a·sel songni nokni manderang da·o gita wachini somoirangode neng·nikanirangko chagrongna nangtokengachim.
“Ia PMGSY ramako matchotgija galchipe donaniara contractor-rangni aro kamko nirokenggipa official-rangni tangka jakkalsretaniko mesokanisa ong·enga. Ia ramako matchotgija galchipe donengani a·sel songni nokni manderang aro mongsongbate sagipa ding·gipa manderangko hospital-rangona ra·rurana nangani somoirango namen neng·nikanirangko chagrongna nangtokenga,” ine FKJGP Nengkhra circle-ni president parakatenba, ia ramako ta·raken matchotate on·china dabiangaha.
Ia ramako ta·rake matchotate on·jagenchimode ku·rangmangmangkosan on·aigija kamtangko name ka·jaenggipa contractor-rangni kosako rakgipa ja·kurangko de·anggen ineba FKJGP Nengkhra circle-ni president, mikrakataniko on·angaha.