SHILLONG: Shillong songjinmani Mawdiangdiang-o rikenggipa gital Assembly building-ni protchong be·gruani gimin CBI-chi inquiry-ko dakatchina, ong·jaode Chief Minister-ni kamko wate on·china BJP dol dabiengon, uko Meghalaya Democratic Alliance (MDA)-o bakrimenggipa dingtang dingtang MLA-rangsa chief minister-ni kamna seokahani gimin ua an·tangaride chief minister-ni kamko watna man·jawa aro MDA MLA-rangni nangnikani gitasa ong·na man·aigen ine Mongolbar salo, a·dokni Chief Minister Conrad K Sangma parakatskaaha.
Gital Assembly building-ni potchrong be·gruaniko CBI-chi inquiry dakna gita Chief Minister ra·chakna nanga ong·jaode an·tangan kamtangko watna nanga ine Sombar salosan, Tura-ni MDC aro BJP-ni state vice president Bernard N Marak dabiangahachim ine nikna man·a.
A·dokni Chief Minister Conrad K Sangma aro Tura-ni BJP MDC Bernard N Marak sakgnian South Tura constituency-ni membor-rang ong·e re·baenggipa 2023 bilsini Assembly election-o susagrikani cholrang donga ine niksamsona man·engachim.
Batanggimin somoirangoba Tura-ni MDC Bernard Marak, NPP-chi dilenggipa MDA sorkarini dingtang dingtang kamrangna matnange songbadrango sedoatahachim ine nikna man·a.
Indake ong·engon, an·tangko chief minister-ni kamoniko watchina Marak-ni dabienggipani bidingo Conrad aganchakaniko on·atskaenba, uko MDA-ni member-rang aro MLA-rangsa chief minister-ni kamna seokahani gimin ua an·tangde kamko watna bil dongja aro MDA-o bakrimenggipa dingtang dingtang dolni MLA-rangsa an·tangtangni nangnikani gita ja·kuko de·na bil donga ine parakatskaaha.
“Angni chief minister-ni kamko watanide angni jako ong·ja aro MLA-rangsa ja·kuko de·na bil donga. MDA-ni MLA-rangsa angko seokahani gimin uamangan an·tangtangni skani gita ja·kuko de·china,” ine Sangma parakataha.
Gital Assembly building-ni protchong be·gruaniko CBI-chi am·sandichina dabienggipani gimin aganchakaniko on·angskaengon, iani bidingo inquiry-ko technical body dakna nangani giminan High Powered Committee (HPC), third party-ko seoke, IIT Guwahati, IIT Kolkata aro IIT Delhi-na pakwatna gita tik ka·manaha ine Chief Minister parakataha.