HSSLC porikkani result-rangko MBOSE parakata

TURA: Bilsianti Meghalaya Board of School Education (MBOSE)-ni ong·atenggipa ia 2022 bilsini Higher Secondary School Leaving Certificate (HSSLC) Science, Commerce aro Vocational porikkani result-rangko mijal Bristibar pringo parakataha.

HSSLC Science porikkao Laban Bengalee Boys’ Higher Secondary School-ni Gyanesh Roy Bhowmik, 469 mark-rangko man·e Top 10-ni skanggipa gadangko man·aha aro Commerce stream-o St Anthony’s Higher Secondary School-ni Riya Kharpran, 464 mark-rangko man·e Top 10-ni skanggipa biapko man·rikskaaha.

Science stream-o pass ka·ani percentage 71.62 percent gapaha aro ia chang HSSLC Science porikkako segipa gimik sak 3033 candidate-rangoni sak 2138 candidate-rang chu·sokgipa ong·na man·aha. Science stream-o sak 1036 first division-o, sak 960 second-o aro sak 33 candidate-rang, third division-o pass ka·e chu·sokgipa ong·aha.

Commerce stream-o pass ka·ani percentage-ara 83.63 percent gapskaaha aro ia chang Commerce-ko segipa sak 2069 candidate-rangoni sak 1712 chu·sokgipa ong·na man·aha. Commerce stream-o sak 719 first division-o, sak 801 second division-o aro sak 82 candidate-rang third division-o pass ka·skana man·aha.

Vocational stream-o sak 8 porikkako seaha aro uamang pilakan chu·sokgipa ong·na man·aha. Vocational-o sak 2 first division aro sak 6 candidate-rang second division-o pass ka·tokskaaha.

Science stream-ni Top 10-o pass ka·gipa gipin candidate-rangara, Laban Bengalee Boys HS School-ni Rishi Sarkar (2^nd), Tura Don Bosco College (Higher Secondary Section)-ni Chetna Bose (3rd) Cherrapunjee RK Mission Higher Secondary School-ni Nazariolan Synrem (4^th), St Anthony’s-ni Armanki War (5^th), Cherrapunjee RK Mission HS School-ni Balarihun Kharlukhi (6^th), St Anthony’s-ni Daemon Shaaniang B Shullet (7^th), St Anthony’s-ni Mewaksandor Ymbon (8^th), Risa Hr Sec School-ni Phibajanai Khardewsaw (9^th) aro Phulbari JN Hr Sec School-ni Rakibul Hazarika (10^th) ong·a.

Commerce stream-ni Top 10-o pass ka·gipa gipin candidate-rangara, St Edmund’s Higher Secondary School-ni Emerene Kharpran (2^nd), Tura Don Bosco College (Higher Secondary Section)-ni Keshav Agarwala (2^nd), Laban Bengalee Boys’ Higher Secondary School-ni Chirag Deb (3^rd), St Anthony’s-ni Laizomlien Gangte (4^th), St Edmund’s Hr Sec School-ni Shraddha Dutta (4^th), St Anthony’s-ni Supriya Das (5^th), St Margaret’s Hr Sec School-ni Tulsi Dey (6^th), St Mary’s Hr Sec School-ni Ibadashisha Jana (7^th), St Anthony’s-ni Sneha Bhattacharjee (8^th), Seven Set Annexe Hr Sec School-ni Balajied Kynsai Biam (9^th) aro St Anthony’s-ni Eliona Baniada Nongrum (10^th) baksana St Mary’s Hr Sec School-ni Ankita Pal (10^th) ong·skaa.