TURA: South West Garo Hills a·jani dingtang dingtang biaprango niam gri chalaienggipa ita aro bol ratani karkanarangko chipatchina gita Ampati-ni All A·chik Youth Federation (AAYF), South West Garo Hills a·jani Deputy Commissioner-na sedoataha.
AAYF South Western Zone (SWZ)-ni parakatani gitade, South West Garo Hills a·jani Ichaguri, Thakuranbari, Talbari aro Monabari songrango dam 15-mangni gita niam gri chalaienggipa ita karkanarang donga ine koborko man·soahani gimin ia karkanarangko chipchina uamang, karkana nokgiparangna u·iatahachim indiba karkanako chalaienggipa manderang, da·oba ia karkanarangko drae niam gri chalaitokkuengachim.
“Ia jolrango niam gri chalaienggipa ita karkanarangko sorkarioni maming champenganirang dongjaengani a·selan karkana nokgiparang maming kennani ia ita karkanarangko niam gri chalaitokenga,” ine AAYF-ni dilgiparang parakatenba, ia ita karkanarangko ta·raken chipatchina gita SWGH a·jani Deputy Commissioner-ko didiataha.
South West Garo Hills a·jani dingtang dingtang biaprango niam gri bol ratani karkana (saw mill)-rangkoba chalaienga ine janapatengon, Majigre, Chigitchakgre, Adugre, Banduraja, Ampati Latrigre, Rangsakona Bangre, Chongpotgre Hajongpara, Mellim, Betasing, Darugre, Koligre aro Balughat songrango dam 15-mangni gita niam gri bol ratani karkanarangko chalaiengani a·selan ia songrango bol wa·arang gimaroroangengaha aro buring bolgrimrang porongrong ong·roroangengaha ine AAYF parakataha.
“Ampati-o Forest department-ni office donggenchimoba, ia songrango maming kenmangijan bol ratani karkanarangko chalaitokenga aro iani a·selan South West Garo Hills a·jani bol wa·arang gimaroroangengaha,” ine AAYF-ni dilgiparang parakatenba, ia niam gri chalaienggipa saw mill-rangkoba ta·raken chipatchina SWGH-ni Deputy Commissioner-ko didiataha.
Indake ong·engon, Dimiligre songoni Aningpara songona tariangenggipa PMGSY ramako matchotgija galchipe donenga ine AAYF-ni dilgiparang, SWGH a·jani Deputy Commissioner-na badi ka·doatenba, songni manderangna ia kamko niatchina gita didiataha.
SWGH a·jao niam gri chalaienggipa ita aro bol ratani karkanarangko chipatchina AAYF dabia
Date:
Share post:
