SHILLONG: Meghalaya a·doko NPP-chi dilenggipa MDA sorkario bakrimaniko BJP watkujawa ine Bristibar salo, BJP-ni dilgipa aro Cabinet Minister Sanbor Shullai parakataha.
NPP-chi dilenggipa MDA sorkariko niam gri koela badinganina, Power department-ko jakkalsretanirangna aro dingtang dingtang ong·gija kamrangna matnange BJP-ni mitam dilgiparang, MDA-o bakrimaniko ra·pilna chanchitokengachim ine nikna man·a.
Indake ong·engon, MDA-o bakrimaniko watanide ma·mongo BJP-ko dilenggiparangni jakosa ong·ani gimin a·doko iani gimin jegrikna nangani katta dongja ine BJP MLA parakatskaenba, MDA sorkarini term bon·kujaskal bakrimaniko watjawa ine talataniko on·angaha.
Shullai-ni parakatani gitade, BJP-ni state president Ernest Mawrie-ni suk ong·nikgijanirangko da·o MDA-ni apsan tom·e chanchirimani somoio a·dokni Chief Minister Conrad K Sangma talate on·anggen.
“Sorkariko dingtang dingtang dolrang nangrime chalaianiode iandake ma·sisretgrikanirang aro sing·dona nanganirang dongaia indiba iako darangba dal·e ra·na nangani katta dongja,” ine BJP Minister aganaha.
Conrad Sangma-ni chief minister ong·e dilanio an·tangni ka·dongchakaniko parakatengon, ia sorkari a·dokni dingtang dingtang nanganirangko chu·sokate on·na man·aha aro neng·nikanirangkoba namatna man·aha ine Shullai parakataha.
Re·baenggipa 2023 bilsini Assembly election-o BJP dol, skang changona bate nambate dakna man·gen ineba ua an·tangni ka·dongsoenganiko parakataha.
MDA sorkarina chakpaaniko watani bidingo bakan a·dokni BJP dol chanchianggen aro iani bidingo ma·mongni dilgiparangna u·iatgen ine adita salrangna skangsan, BJP-ni state president Ernest Mawrie parakatahachim.