TURA: Garo Hills-ni dingtang dingtang NGO-rang, chong·motan GSU, ASWA, GSMC aro iandakgipa dingtang dingtang dolrangni nangrime bikotskagipa All Garo Hills Joint Action Committee (AGHJAC)-ni gita, North Eastern Hill University (NEHU) Tura campus-ni Pro-Vice Chancellor G Singaiah-ko ra·galchina dabiangenba, uko ta·raken kamoniko ra·galjagenchimode jingjengatanirangko dakanggen ine mikrakataniko on·angaha.
NEHU Tura campus-ni PVC-ko ra·galan baksana dingtang dingtang dabianirangko chu·sokate on·jaengani gimin re·anggipa bilsioba AGHJAC, NEHU Tura campus-ni kosako jingjengatanirangko dakangahachim ine nikna man·a.
Ua somoio NEHU Shillong campus-ni Vice Chancellor, Tura-ona re·bae jingjengatenggipa dolrangna ku·rachakanirangko on·angani ja·manosa JAC-ni jingjengataniko dontongatpilahachim.
Indake ong·engon, Vice Chancellor-ni ku·rachakaniko on·angaoni da·o jadok batpilengahaoba, uamangni dabianirangko chu·sokate on·kujaengani gimin AGHJAC, suk ong·gijaniko parakatenba, gital dake jingjengataniko a·bachengpiltaina tik ka·angaha.
“NEHU Tura campus-ni PVC-ko ra·galchina aro chingni dingtang dingtang dabianirangko chu·sokate on·gen ine Vice Chancellor ku·rachakaniko on·angahaoba da·alonan chingni dabianirangko chu·sokatkujaenga. Uni gimin chinga nanga gita ja·kurangko de·piltaina tik ka·aha,” ine GSU-CEC-ni president aro AGHJAC-ni dilgipa Zikku Balgra Marak parakataha.
Marak-ni parakatani gitade, NEHU Tura campus-ni PVC, politics kal·e roahani a·selsa Post Graduate Students Union (PGSU)-ni election-koba ra·dona nangahachim.
“Maini gimin PGSU-ni election-ko ong·atna on·jaenga chinga ma·sina sikenga. NEHU-ni chatro chatrirangba an·tangtangna dilgipako seokna bil donga indide maina election-ko ong·atna on·jaenga? NEHU-o sawa election-ni chairman aro member-rang ong·enga aro maini gimin chingna talataniko on·jaenga?” ine AGHJAC-ni dilgiparang sing·doataha.