PMGSY ramako matchotja ine matnanggipani gimin PWD, contractor baksa agangrikgen: DC

TURA: Gambegre C&RD Block-ni ning·o Darengre-oni Nengja Bolchugre songona dakanggipa PMGSY ramako taria matchotgija galchipa ine matnangenggipani bidingo West Garo Hills a·jani Deputy Commissioner Swapnil Tembe, PWD (Roads)-ni official-rang aro ia ramako tarigipa contractor baksa agangrikgen ine ku·rachakaniko on·ataha.

Ia ramako taria matchotgija galchipaha ine matnange songni manderang an·tangtangan ia ramako tariani ja·man, songni saksa Ramenson Ch Marak, minggipa mande, social media-o photo-rangko ka·e mesokatahachim. Da·o ia ramako songni manderang an·tangtangan tarie re·rurana jakkalengahaoba wachi sokbae mikkarang wasimsimna a·bachengengahani gimin ia ramana maming ka·donganirang dongjaengachim.

Salsa skangan ia ramani bidingo Gambegre constituency-ni MLA Saleng A Sangma-ba, kobor ra·timgiparangna parakatenba, ia ramako matchotgija donchipahani gimin an·tangni suk ong·gijaniko parakatahachim.

Sangma-ni parakatani gitade, Darengre-oni Nengja Bolchugre songona dakanggipa ramako tarina gita 2014-15 bilsirango a·dokni gitcham chief minister Mukul Sangma-ni chawarigipani pagipa Fersen Momin-na on·ahachim aro ia ramani bidingo ua baditaba chang engineer-rang aro SDO-rang baksa tom·e chanchirimani ja·manoba ia ramako matchotatchipgija donaiahachim.

“Ia ramako ja·amangmangchin re·na namsrangjaha indide gari gorarangde maidake ia ramako re·na man·kugen? Ia ramako baditaba bilsina skangan matchotna nangahachim indiba kamrangko ka·gija donchipahani a·sel da·o iandakgipa obostako chagrongna nangengaha,” ine jolni manderang parakatskaaha.

Indake ong·engon, ia ramani bidingo ua ta·raken PWD (Roads) aro ramako tarigipa contractor baksa agangrikgen ine Deputy Commissioner ku·rachakaniko on·atskaaha.