AMPATI: South West Garo Hills a·jao Prevention of Cruelty of Animals (Regulation of Livestock Markets) Rules 2017-ni ning·o be·en aro matchu-matterangko pale cha·enggiparangna dingtangmancha talatanirangko on·na gita Sukrobar salo District Animal Market Monitoring Committee-ni gita be·en palgipa aro market committee-rang baksa South West Garo Hills a·jani DRDA conference hall-o tom·aniko ong·atangaha.
Ia tom·aniko South West Garo Hills a·jani Deputy Commissioner SK Marak dilangengon, ia niamrangni gimin chanchirimdilangenba, a·jao be·en aro matchu-matterangko pale cha·enggiparang ia niamrangko ja·rikna nanggnok ine talataniko on·angaha.
Niamrangko ja·rikchina aro sorkari baksa bakrimchina be·en palgipa aro matchu matte palgiparangko didiangengon, be·enrangko mongsonggipa ramarangoni chel·e palchina aro gital biaprangko man·e on·kujaskal, be·en palaniko manderang nikatjachina DC didiangaha.
Matchu matterangko salruraengmiting aro chipe donengmiting somoirango ka·saninggija dakanirangko champengna gita niamo pangchake matchu matterangna simsakchina aro dongtogipa biaprangko on·an baksana cha·ani ringanirangkoba somoi gita on·china, South West Garo Hills a·jani District Vetarinary Officer Dr AM Momin didiangskaaha.
Matchu matterangko palna ra·baengon, ia matchu matterangko manderang cha·na namama namja, uko ma·sina gita be·en den·chakgipa biapona ra·angna skangan nanga gita porikkarangko ra·chengna nanggen ineba Dr Momin parakataha.
Matchu matte palgipa bazar antirangko da·ontal dipet niam gita kulina nanggnok ine janapatengon, be·en bitinrangko aro matchu matterangko pale cha·enggipa manderangba da·ode Animal Husbandry & Veterinary Office-o biming segatna nanggnok ine Dr Momin parakataha.