Samtangtango ong·telaigiparangko ripingna PES scheme-ko a·bachengata

TURA: Meghalaya a·dok gimikni samtangtango ong·telaigiparangko ripinge rakkina gita Sombar salo, a·dokni Chief Minister Conrad K Sangma, dingtangmancha Payment for Ecosystem Services (PES) scheme-ko Tura-ni Dakkopgre-o donggipa SMELC Building-o a·bachengate on·angaha aro ia scheme-ko a·bachengate on·anganio Chief Minister-ni Adviser Thomas A Sangma-ba dongpae bak ra·angaha.
Ia program-ko ong·atanio a·dokni Chief Minister, dingtangmancha FOCUS program-ni ning·o dingtang dingtang producer group-rangnaba cheque-rangko suale on·angjolaha.
Ia PES scheme-ko a·bachengate on·anganio a·dokni Chief Minister, jinmana aganprakengon, samtangtango ong·telaigiparangko ripinganio jolni manderangko dakchakna aro game ge·e cha·enggiparangna dakchakaniko on·na gita ia scheme-ko a·bachengatenga ine parakangaha.
Ia PES scheme-ko a·dokni manderang namnike ra·chaktokenga ine janapatengon, batanggimin bilsibrina sorkariko chalaianio, NPP-chi dilenggipa MDA sorkari, a·doko game ge·e cha·enggipa manderangni janggi tangani gadangko tang·doatna gita dingtang dingtang scheme-rangko ra·gate on·na man·aha ine Chief Minister parakataha.
Samtangtango ong·telaigiparangko nirokna gita dingtangmancha volunteer-rangko seokchina ua songni nokni dilgiparangkoba didiangaha aro ia PES scheme-ni ning·o samtangtango ong·telaigiparangko ripingna gita sorkari hectare-prakon gong 15,000 tangkarangko dakchake on·gen aro iana sorkari, bilsiprakon gong kror 50-ko chamataha ine Sangma parakataha.
Ia tom·anio Chief Minister-ni Adviser Thomas A Sangma-ba jinmana aganprakengon, Village Natural Resources Management-ni bidingo talataniko on·angenba, Himachal Pradesh a·dokni ja·man, salgro salaram a·dokrango Meghalaya a·dokan PES scheme-ko ra·gatchenggipa ong·aha ine parakangaha.
Ia program-ko ong·atanio dongpae jinmana aganprakanggipa gipin manderangara, West Garo Hills a·jani Deputy Commissioner Swapnil Tembe, CLLMP-ni Additional Project Director Gunanka DB, Baladinggre A·kingni Nokma Klason T Sangma aro gipinrang ong·a.