TURA: South West Garo Hills a·jani Rangsakona Mothers Union aro AHAM South Western Zone Ampati-ni gita nangrimenba, Rangsakona Higher Secondary School-o dingtang dingtang nangchongmotgipa u·ina nanganirangko skulo poraienggipa chatro chatrirangna agan-talate on·na gita awareness program-ko ong·atangaha.
Ia program-ko ong·atanio Rangsakona-ni MLA Zenith Sangma, mongsonggipa sokgipa ong·e bakko ra·angenba, chatro chatrirangna agan-ku·pattianirangko on·angaha.
Ia program-ko ong·atanio South West Garo Hills a·jani Additional Deputy Commissioner AVD Shira-ba dongpae chatro chatrirangna agan-ku·pattianirangko on·angengon, bilsi sokgija bia ka·anichi chadamberangni janggi tanganio mai nangchakeanirangko ra·bana man·a aro chadamberangni gisikni gita neng·nikanirangko man·ani bidingo agan-talatanirangko on·angaha.
Ia program-ko ong·atanio Ampati Women Police Station-ni WG Momin, Human Trafficking ba manderangko rim·gittange pale cha·ani bidingo chatro chatrirangna mikrakatanirangko on·angskaaha.
Indake ong·engon, ia program-ko ong·atanio chatro chatrirangna, mobile phone aro social media-ko jakkalani, drugs ba pekatgipa samrangko jakkalani aro uandakgipa dingtang dingtang kamrangni bidingo Ampati Baptist Mondolini Pamong Wepster G Sangma, Garobadha PHC-ni Dr Balnamchi A Sangma aro gipin dilgiparang, agan-talate on·angskaaha.
Ia awareness program-ko ong·atanio Rangsakona HS School baksana Bidan Bisik English School aro Jalluagre SSA School-ni chatro chatrirangba bakko ra·angtokaha.
