SHILLONG: A·doko name kam ka·gijagipa dingtang dingtang program aro scheme-rangna ma·mongo BJP-chi dilenggipa NDA sorkari, nanga gita ja·kurangko de·gen ine BJP-ni national secretary aro Ranchi-ni Mayor Asha Lakra parakataha.
Meghalaya a·doko ma·mong sorkarini ra·gatgipa dingtang dingtang scheme aro program-rangko jakkalsretenga ine matnangenggipani bidingo sing·anina aganchakaniko on·angengon, ma·mong sorkari iani bidingo nanga gita ja·kurangko de·anggen ine Lakra parakataha.
“Iarangko ma·mong sorkari aro a·songni Prime Minister name nirikkie dongenggen aro nanga gita ja·kurangko de·angaigen,” ine Lakra aganenba, BJP dolni mongsonggipa miksonganian tangka jakkalsretani grigipa India a·songko ong·atanisa ong·a ine parakataha.
Ma·mong sorkarini ra·gate on·gipa Jal Jeevan Mission aro dingtang dingtang scheme-rangko Meghalaya a·doko jakkalsretenga aro kamrangko name chu·sokatjaenga ine a·dokni BJP dol, a·dok sorkarini kosako changni chang matnanganirangko dakahachim ine nikna man·a.
Iana skang, BJP dolni state president Ernest Mawrie-ba sing·anina aganchakaniko on·angengon, NPP-chi dilenggipa MDA sorkario bakrimaniko ra·pilani bidingo ma·mongni BJP dilgiparang chanchianggen ine parakataha.
Meghalaya a·doko ong·enggipa obostarangni gimin ua report-ko BJP-ni dilgiparangna, da·o ong·atna sienggipa national executive committee tom·anio on·anggen ineba Mawrie parakataha.
Iani bidingo BJP-ni MLA sakgnian, chong·motan AL Hek aro Sanbor Shullai-ba, ma·mongo BJP dilgiparangni chanchianiko sengkuna nanggen ineba BJP-ni state president parakataha.
Meghalaya a·doko NPP-chi dilenggipa MDA sorkario bakrimaniko BJP watkujawa ine adita salrangna skangsan, BJP-ni dilgipa aro Cabinet Minister Sanbor Shullai parakatskaahachim ine nikna man·a.
MDA-o bakrimaniko watanide ma·mongo BJP-ko dilenggiparangni jakosa ong·ani gimin a·doko iani gimin jegrikna nangani katta dongja ine BJP MLA parakatenba, MDA sorkarini term bon·kujaskal BJP-ba bakrimaniko watjawa ine talataniko on·angahachim.
Name chu·sokatgijagipa scheme-rangna ma·mong sorkari ja·kuko de·gen: Lakra
Date:
Share post:
