SHILLONG: Batanggimin konta 24-ni gisepo mikkarang jimbee waanganichi a·dokni dam 12 a·jarango ong·enggipa obostarangko nipilna gita Sukrobar saloba a·dokni Chief Minister Conrad K Sangma, dingtang dingtang a·jako nirokna songe dongimin regional committee-rang, deputy commissioner-rang, police official-rang aro dingtang dingtang department-rang baksa video conference gita tom·aniko ong·atangtaiaha.
Batanggimin konta 24-ni gisepo a·sel ong·anirangna aro manderangni sianina an·tangni suk ong·gijaniko parakatengon, iandakgipa somoirango a·jani nangani kri pilak nanga dakchakanirangko on·na gitaba Chief Minister, ku·rachakaniko on·angaha.
Ia tom·anio dingtang dingtang a·jani deputy commissioner-rang, a·jatangtango ong·anggipa a·selrangni gimin, manderangni siani gimin aro dakchakanirangko nangenggipa manderangna dakchakanirangko on·enggipani bidingo Chief Minister-na agan-talate on·angtokaha.
Indake ong·engon, a·jatangtango nangchongmotgipa bosturangko chu·onga gita rakkie donchina, kenchakna nanggipa biaprangoniko manderangko rimongkatchina, manderangna dongchakani a·tiprangko sandie on·china, sianggipa manderangni nokdangrangna ta·raken tangka paisarangko on·china aro a·jarango champengata man·gipa ramarangko ta·raken tarie on·china gita Chief Minister, regional committee-rangko, deputy commissioner-rangko aro department-rangko didiangaha.
Manderangna naljokaniko on·china didiangengon, chi banrongbatgipa biaprangko aro a·a ruronggipa biaprangko ma·sie ra·na gita joltangtangni dilgiparang baksa agangrikenba, iandakgipa biaprango songdongenggipa manderangko naljokgnigipa biaprangona apjitatchina a·dokni Chief Minister, dingtang dingtang a·jani deputy commissioner-rangko didiataha.