SWGH a·jao dam 107 songrangko chi banna

TURA: South West Garo Hills a·jaoba dontonggija mikkarang jime waangani ja·man gimik dam 107 songrangko chi banangaha aro ia songrango donggipa sak 32,000-na baten manderang neng·nikanirangko man·angtokaha ine official-rang u·iataha.
Official-rangni u·iatani gitade, mikkarang dontonggija waanganichi South West Garo Hills a·jani damgittam block-rang, chong·motan Rerapara C&RD Block, Zikzak C&RD Block aro Betasing C&RD Block-rangon chirang banaha aro ia damgittam block-ni ning·o donggipa dam 107 songrang nangchakeaniko man·angaha.
Rerapara block-o dam 16 songrangko chi banahani a·sel sak 10,273 manderang, neng·nikanirangko man·tokaha aro uamangna Mukdangra Bazar, New Harigaon LP skul, Old Harigaon LP skul, Sangkarigre waiting shed aro Garobadha merong bazar-rango relief camp-rangko songe on·aha ine official-rang u·iataha.
Zikzak C&RD Block-ni ning·o dam 59 songrangko chi banskaaha aro ia songrango dam 17 nokrang nosto ong·atako man·an baksana sak 27,000-mangni manderang neng·nikanirangko man·tokahani gimin damsku relief camp-rangko songe on·skaaha ineba official-rang parakataha.
Betasing Block-o dam 32 songrangko chi banaha aro ia songni manderangna dambonga relief camp-rangko songe on·aha ineba kobor on·aha.
Ia songni manderangna District Administration, gratuity relief-ko on·na a·bachengaha aro PHE-ni gitaba rongtalgipa chirangko suale on·na a·bachengaha ine official-rang parakataha.
Mikkang salrangoba mikkarang waangkugen ine Indian Metereological Department (IMD)-oni u·iataniko man·soahani gimin District Administration aro District Disaster Management Authority-ni official-rang, kenchakna nanggipa biaprangko name nirikkina aro koborrangko ra·runa a·bachengataha.
South West Garo Hills a·jani Ganol, Daru aro Dorni chiringrang dal·bana a·bachengahani gimin official-rang, ia chiring sambao donggipa songrangko name nirokna a·bachengaha ine u·iataha.