TURA: South Garo Hills a·jao bijoli aro mobile network-rang dongjaengani a·sel, jolni manderang baksa agangrikna man·jae dakchakanirangko on·ena man·jaenga ine Budbar salo, Tura-ni BJP MDC Bernard N Marak parakataha.
Marak-ni parakatani gitade, mikkarang waanganichi chi banani aro a·arang be·dapanio neng·nikanirangko man·enggipa South Garo Hills a·jani manderangna BJP dolni gitaba, merong, sam, ba·ra kancha aro uandakgipa ma·manti nanga bosturangko on·gilatna miksongengachim indiba South Garo Hills a·jani bang·bata biaprangon bijoli aro mobile network-rang dongjae, songni nokni manderang baksa agangrikna man·jaengani a·sel dakchakanirangko on·atna man·jaengachim.
“South Garo Hills a·jao bijoli aro mobile network-rang donggijani antisamang ong·na siengaha aro chinga uamang baksa agangrikna gipin cholrangko man·jaenga. On·gilna sikenggipa manderang, re·ange bosturangko on·gilna man·na gita gipin cholrangko tarie on·na nanga,” ine Marak parakataha.
BJP dolni gita South Garo Hills-ni manderangna samrang aro pilak nangchongmotgipa bosturangko an·tangtangni ama gita on·gilatna miksongengachim ine janapatengon, iandakgipa obostani somoio saksa sakgipinni aro dingtang dingtang department-rangni kamko matnanggrike dongaigija manderangko jokatna pilak dilgiparangan apsan nangrime kamko ka·na nangenga ine Tura-ni MDC parakataha.
“Duko ga·akenggipa nokdangrangna pilak nanga dakchakanirang somoi gita sokanggen ine chinga ka·dongenga. Duko ga·akenggipa manderangni dakchakanina grapaniko social media-rango niksona man·enga aro iandake gipin biaprangoni ma·ekatako man·gipa biaprang dongani gimin chinga namen suk ong·ja,” ine Marak parakataha.
Comments are closed.