SHILLONG: Meghalaya a·doko mikkarang waanganichi chirang banne aro a·arang ruronge nosto ka·a man·gipa rama jal·langrang aro nok-jamrangko taripilan baksana duko ga·akenggipa manderangna dakchakanirangko on·anio gong kror 300-na baten koros ong·naba gnang ine a·dokni Chief Minister Conrad K Sangma parakataha.
“Mikkarang waanganichi nangchakeaniko an·ching a·dok gimikon nikna man·aha. Iani bidingo hisapanirang matchotkujaskalde an·ching indita koros ong·gen ine aganna man·kujawa,” ine Sangma, kobor ra·timgiparangna aganaha.
Meghalaya a·doko chi banani aro a·arang be·na a·bachengo hisapchengani gitasan gong kror 300 tangkarangko ma·mong sorkarioniko bi·atchengaha ineba Chief Minister parakataha.
“Angni Delhi-ona re·angani somoio a·doko iandakgipa obostarang ong·ahani gimin anga Union Home Minister Amit Shah-na mesokna gita preliminary report-ko aro nangchakeanio noksan ong·gipa korosko ra·angjolna nangnikaha. Uandaken, nosto ka·ako man·gipa rama jal·langrang, gama ge·anirang aro nok-jamrangni korosrangko hisape on·china anga PWD aro gipin department-rangko aganaha,” ine Chief Minister parakataha.
Nambate hisap ka·na man·na gita ma·mong aro a·dokni dolrangchi apsan nirokechina gita Union Home Minister ku·pattianiko on·skaaha ineba Sangma aganaha.
Chief Minister-ni parakatani gitade, chirang bananichi aro a·arang ruronganichi nosto ka·a man·gipa bijolirangkode bang·bata biaprangon tarimanaha indiba rama jal·langrangko taripilanisa ra·biani ong·enga.
Samgnichipaknin ramarang nosto ka·ako man·gipa biaprangona rama tarigipa ostrorang sokangna man·kujaengani gimin ia biaprango donggipa rama jal·langrangko tarianio somoiko nanggnok ineba Chief Minister parakataha.
“Ia biaprangko anga nieaha aro changsaba angni gisik ra·ani gitade, iandake nosto ka·anirangko anga nika dongkuja. South Garo Hills jolrangona angni re·angon, Simsang chibimaba konta gittamni gisepon pangna ong·ronggipaoni feet 30 ba feet 40-mang tu·bataha,” ine Sangma aganaha.
Indake ong·engon, rama jal·langrang dongjae neng·nikanirangko man·enggipa manderangna nangchongmotgipa cha·ani bosturang aro pilak nanga dakchakanirangko on·engani gimin ua, Indian Air Force aro BSF dolrangko mittelpilataha.