TURA: North Eastern Hill University (NEHU) Tura campus-o poraienggipa sak 27 chatro chatrirang, COVID-19 man·ani ja·man ia campus-ni pilak hostel-rangkon micro containment zone dakataha ine West Garo Hills a·jani Deputy Commissioner parakataha.
Iani bidingo u·iataniko on·angengon, manderangni namgnina aro COVID-19 batrikrikjana gita COVID-19 positive ong·gipa chatro chatrirangko, uamangni dongchakenggipa hostel-rango dingtang napate donenga ine Deputy Commissioner parakataha.
Ia hostel-rangko micro containment zone dakengmiting somoirango darangba hostel-oni ong·katna man·jawa aro a·palrangoniba darangba hostel-ona re·angna man·jawa ine Deputy Commissioner u·iataha. Ia containment zone-o ga·akenggipa nokni manderangkoba noktangtangon nape dongchina Deputy Commissioner u·iataha.
Ia hostel-rango donggipa chatro chatrirangna pilak nanganirangko on·china gita NEHU-ni official-rangko u·iatengon, ia biaprangko name nirokchina gita Rongram-ni BDO-na Deputy Commissioner, daitoko on·angaha.
Koborko on·ani gitade, NEHU Tura campus-o COVID-19 positive ong·gipa sak 27 chatro chatrirangoni sakgittamkosan Tura Civil Hospital-o donenga indiba gipinrangkode dingtang dingtang hostel-rang, jekai Norombi Girls Hostel, Arbella Girls Hostel, Nokrek Boys Hostel, Sampalgre Girls Hostel aro Working Women’s Hostel-on donengachim.