SGH-ni Kalu songna ma·manti bosturangko on·gilata

TURA: South Garo Hills a·jao mikkarang jime waanganichi chirang banne aro a·arang ruronge nangchakeaniko man·angbatgipa Kalu songni manderangna dingtang dingtang biaprangoni manderang, ma·manti bosturangko on·gilattokaha aro ia bosturangko A·chik Heritage Pursuits (AHP) dolni membor-rang, Kalu songona sokate on·eaha.
AHP-ni u·iatani gitade, dingtang dingtang mondolirang, skulrang, Wildlife Trust of India, Tura, Williamnagar, Dalu aro dingtang dingtang biaprango songdongenggipa manderangko man·chape dingtang dingtang dolrangba tangka paisarangko ka·sae on·giltokaha aro uandaken tangka paisarangko gilgrimanio gong 3,80,000/-mangko chimonge man·aha.
Tangka paisarangna agreba dingtang dingtang dolrang aro manderang, mirong, dal, chini, kari, me·dik sam·dik, kombol, tarpaulin, kerosene stove, kerosene aro ba·ra kancharangkoba Kalu songni manderangna on·gilattokaha ine u·iataha.
Tangka paisarang baksana ma·manti bosturangko on·gilatgipa dingtang dingtang dolrang aro mondolirangara, Tura Baptist Church, Aeroville School, Don Bosco College, Dura Wasa Club, PWD Building Division, PHE Rongjeng, Chiring Dokru SHG, GHADC-ni CEM, Father Fellowship Football Team, Garo Engineering Band, Bolanchi A·ding, Tura-ni Blue Van, Ku·simkol Baptist Church aro gipinrang ong·a.

Get real time updates directly on your device, subscribe now.

Comments are closed.