SHILLONG: Ia bilsini a·bachengachibara Meghalaya a·dok gimikon COVID-19 man·giparang komiangahaoba da·o rang·san ia ja dipetan COVID man·giparang batrorobataiengahani gimin a·doko songdongenggipa manderangko mikrake dongchina sorkari u·iataha.
Re·anggipa June jani bon·angaona kingkingan Meghalaya a·doko COVID-19 man·giparang sak 10-na bate komibatangahachim indiba ia July jako ga·tapani bakan a·doko COVID-19-ko man·giparang rang·san tang·dona a·bachengaha aro uandaken da·o a·doko COVID-19 man·giparang sak 100 batangtaiahachim.
Ia bilsini a·bachengaonin a·doko COVID-19-ko man·giparang komiangna a·bachengahani gimin manderang bang·batan da·o mask-rangko gangija aro an·tangtangna maming simsakani gri ong·katna aro jinma tom·bimonganirango bak ra·na a·bachengpiltaiahachim.
Indake ong·engon, a·doko da·o COVID-19 man·giparang ka·sinsin batrorobataiengahani gimin a·doko songdongenggipa manderangko simsake dongchina aro ia sabisiko namrenge ra·jachina gita a·dokni Health Minister James Sangma didiataha.
COVID-19-na mikrake dongchina manderangko didiatengon, “Da·o dipet a·doko COVID-19 ta·raken giproroengaha inede aganna man·kujawa. Badiaba badiaba biaprango sabisi man·giparang dongenga indiba chinga obostarangko name nirikkienga,” ine Health Minister parakataha.
A·doko obostarangko mikkangpana gita sorkari tariaha ine janapatengon, a·doko ong·enggipa obostarangko niroke sorkari nanga gita kamrangko ka·anggen ine Sangma parakataha.
“Indake ong·genchimoba an·ching chu·ongnike dongaijana aro an·tangtangba simsake dongna. Da·o dipet an·ching COVID-19-ko bon·atsrangade ong·kujaengani gimin an·ching pilakan mikrake dongna,” ine Health Minister parakataha.