TURA: Boldamgre GHADC constituency-ni MDC Stevie Marak, Sukrobar salo, an·tangna kam ka·enggipa sak 300 manderang baksa National People’s Party (NPP)-o napangaha.
Boldamgre-ni MDC Stevie Marak-ba Congress tikitchi susae MDC-na seokako man·ahachim indiba ia bilsini a·bachengachibara, Garo Hills Autonomous District Council (GHADC)-o Congress dolni pilak MDC-rangan AITC-o napgopangani ja·man Marak-koba AITC-o napna ka·dongsoengachim.
Congress dolni MDC-rang AITC-o napgopangani ja·man Marak an·tangde AITC-oni ong·kate, ia bilsini February jaon NPP-o napgen ine paraksoa dongachim.
GHADC-o da·o dipet anti-defection law dongkujani a·sel MDC-rang, dolsaoni dolsaona katjojoe rona man·engkua aro uandaken Stevie Marak-ba Congress-oni AITC-o napangani ja·man da·o NPP-o napangskaaha.
NPP-o napangani gimin talataniko on·angengon, Boldamgre GHADC constituency-ba Ampati Legislative Assembly Constituency-ni ning·o ga·akgipa constituency-an ong·achim indiba joltangni MLA, ia constituency-na maming dakchakanirangko on·jahani gimin suk ong·jae da·o NPP-o napangskaaha ine Boldamgre MDC Stevie Marak parakataha.
Meghalaya a·doko NPP bilakbatrorobaenga aro mikkang bilsini election-oba NPP dolan gnigipa changna sorkariko rikpiltaiani cholrang donga ineba Marak aganaha.
Marak da·o NPP-o napahani gimin re·baenggipa 2023 bilsini Assembly election-o ua NPP dolni tikitchi Ampati LAC constituency-o AITC-ni MLA aro Dr Mukul Sangma-ni demechik Miani D Shira baksa susanaba gnang ine ka·dongsona man·enga.
