TURA: Dingtang dingtang biaprangoni aro mongsongbate Assam a·dokoni re·napbae Garo Hills Autonomous District Council (GHADC)-ni a·arango niam gri songdong a·chaenggipa nokdangrangko ta·raken a·rikgalatchina gita Phulbari aro Chibinang jolo donggipa dingtang dingtang NGO-rang, GHADC-ni dilgiparangko didiataha.
Bristibar salo ia NGO-rang, GHADC-ni chief executive membor aro gipin executive membor-rangko grongenba, District Council-ni a·arango niam gri songdong a·chaenggipa nokdangrangko a·rikgalchina didiangtokaha.
NGO-rangni parakatani gitade, jabrina skangan Chibinang jolo donggipa GHADC-ni a·arangko totaie, ia biaprango niam gri songdongenggipa nokdangrangna eviction notice-ko on·ahachim aro sal 10-ni gisepon GHADC office-na aganchakaniko on·china ge·etahachim. Eviction notice-ko on·aoni da·o jasa batpilengahaoba, ia biaprango niam gri songdong a·chaenggipa nokdangrangni kosako GHADC maming ja·kurangko de·kujaenga ine NGO-rang parakatenba, ia biaprango niam gri songdongenggipa nokdangrangko ta·raken a·rilgalchina GHADC-ni dilgiparangko didiangaha.
Gipin biaprangoni bading chiwalgipa manderang Garo Hills-ona re·napbae, maming nangchongmota lekkarang gri bading chiwale cha·engani giminba NGO-rang, Taxation-ni executive membor baksa agangrikangaha aro iandakgipa manderangko mikrakbate nirok sandichina didiangaha.
Garo Hills-o aro mongsongbate a·kawe jolrango niam gri bol ratani karkana aro ro·ong quarry-rangko chalaiengani giminba NGO-rang, GHADC-ni dilgiparang baksa agangrikangaha aro ia bol ratani karkana aro ro·ong quarry-rangko chipatchina didiangtokaha.