WILLIAMNAGAR: Williamnagar GSU president Saljrang Tengrik R Marak-ni u·iatani gitade a·dok srokari uamangni dabianirangna nachil songjaenga, indake salskuna kingking office picketing ka·pile dabianirangko dakgenchimoba uamangni dabianirangko sorkari knachakteljaenga ineba Union dilgipa aganaha.
Uamangni nangnike dabigiparangko sulsul seenba re·anggipa 2020 bilsion chief Minister Conrad sangma aro Opposition dilgipa Dr. Mukul Sangma mang sakgninan on·manahachim. Uni ja·man re·anggipa June 27 tarikoba Power Minister-naba memorandum see on·ahachim, indakoba a·dok sorkarioni aro MeECL authority-rangoniba maming aganchakaniko on·jaha ine GSU dilgipa aganaha.
Indake ong·engon chingni nangnike dabianirangko Sorkarini da·le ra·jani gimin aroba chu·sokatjani gimin chinga duk man·a ine Union suk ong·gijaniko parakaha.
Uamangni dabianirangko chu·sokatjani gimin re·anggipa July jao office picketing-koba ka·pilaha indakoba sorkari chingni dabianirangko chu·sokatjaha, unigisepon da·o minggipin dake jingjengataniko dakahaoni chingni dabianirangko chu·sokata chu·sokatjana kingkingde dontongskajawaha ine Union mikrakataha.
Garo Hills-na neng·nikatani gri biljoliko on·china, Garo Hills-ni MeECL ba Power Department-o chu·onga gita kam ka·giparangko rakkichina, mande dondapgijade Garo Hills-ni employee-rangko Khasi Hills-na jitatjachina, iarangan Union-ni mongsonggipa dabianirang ong·enga ine GSU dilgipa u·iataha.