TURA: Namroro silroroani aro dingtanganiko ra·bana gita register ka·e kam ka·enggipa Garo Hills-ni dingtang dingtang dolrangna Yess Meghalaya program-ni ning·o a·dokni Chief Minister Conrad K Sangma, Sukrobar salo cheque-rangko suale on·angaha.
Ia Yess Meghalaya program-ko a·bachengate on·anganio a·dokni Chief Minister, jinmana aganprakangengon, Meghalaya a·doko dol 3000-na baten, an·tangtangko register ka·e, dingtang dingtang kamrango namroro silroroaniko ra·bana kam ka·enga aro ia dolrangna a·dok sorkari, Yess program-ni ning·o tangka paisani gita dakchakanirangko on·anggen ine parakataha.
Chief Minister-ni parakatani gitade, sorkarini dingtang dingtang kamrang, jekai samtangtango ong·telaigiparangko ripinge rakkina program aro workshop-rangko ong·atani, Financial literacy workshop aro campaign-rangko ong·atani, pekatgipa samrangko jakkalani namgijani aro bilsi sokgija an·o dongani bidingo mikrakataniko on·na workshop aro seminar-rangko ong·atani, Career Counselling aro Career Guidance-ni workshop aro clinic-rangko ong·atani, gisikni gita an·senge dongani seminar aro campaign-rangko ong·atani, chadamberang jinma volunteer ka·e program-rangko ong·atani, chadamberangni parliament aro jera ra·grikanirangko ong·atani, ma·manti nanga bosturangko breani, office biaprangko kuliani aro uandakgipa kamrangko jako ra·e ka·gipa dolrangna ia Yess Meghalaya program-ni ning·o gong lak 1-ona kingking tangka paisarangko dakchake on·ani donggen.
Ia bilsio, Shillong songjinmao ong·atanggipa Meghalaya Games 2022-o medal chegipa manderangnaba ia tom·anio a·dokni Chief Minister-ni jakchi, cheque-rangko suale on·angjolaha.
Ia Yess Meghalaya program-ko a·bachengate on·angani somoio Garo Hills gimikni dol 65-na Chief Minister, cheque-rangko sualangaha.
Yess M’laya program-ni ning·o GH-ni dingtang dingtang dolrangna cheque-rangko sualata
Date:
Share post:
