CAA aro AFSPA-ko ra·galan baksana ILP-ko ra·gatchina dabie NESO asonge jingjengata

SHILLONG: Citizenship Amendment Act (CAA) aro Armed Forces Special Powers Act (AFSPA)-ko ra·galan baksana salgro salaramni pilak a·dokrangon Inner Line Permit (ILP)-ko ra·gatchina dabie Budbar salo, dingtang dingtang dolrang, North East Students Organisation (NESO)-ni bimingo Shillong Civil Hospital sambao asonge jingjengataniko dakangaha.

Ia jingjengataniko dakani bidingo kobor ra·timgiparangna talataniko on·angengon, a·songni jakgitelko man·chengaonin India sorkari, salgro salaram a·dokrangko aro mongsongbate Tribal jatrangko onchepe mesokengani gimin manderangna aro chadamberangna mikrakataniko on·na gita ia jingjengataniko dakangaha ine NESO-ni chairman Samuel B Jyrwa parakataha.

“Salgro salaram jolrango songdongenggipa Tribal manderangna maming naljokanirangko on·jaenga ong·ode ia dal·begipa India a·songo maikai Tribal-rang naljokaniko man·gen? Tripura a·doko songdongenggipa Tribal-rangni obostako chinga nikmanaha aro da·o ia apsan obostaan Assam a·dokni dingtang dingtang biaprangoba ong·engaha. Indide mikkangchi Meghalaya a·dokna aro salgro salaramni gipin a·dokrangna mai ka·dongani gnang?” ine Jyrwa sing·doangaha.

CAA aro AFSPA-koa a·songni manderangko chel·chaknasa ra·gata ine ma·mong sorkari a·kangenga ong·ode aro salgro salaram jolni manderangkoba India a·songni manderang ine a·kangengode ia jolni manderangni naljokaninaba sorkari warachakna nanga ineba NESO-ni chairman parakataha.

Khasi aro Garo ku·sikrangko Eighth Schedule-o ra·gatchina aro ILP-ko ra·gatchina gita a·doko resolution-ko ra·ani ja·manoba ma·mong sorkari maming ja·kurangko de·kujaengani gimin an·tangni suk ong·gijaniko parakatengon, iandake ma·mong sorkarini knachakgijaniko mesokaniara salgro salaram jolrango songdongenggipa manderangna simsakgijaniko mesokanisa ong·a ine Jyrwa parakataha.

Khasi aro Garo ku·sikrangko Eighth Schedule-o ra·gatchina aro ILP-ko ra·gatchina a·dok sorkarini dabienga ine a·kangenggipani gimin janapatengon, “A·doko ILP-ko ra·gatchina aro Khasi/Garo ku·sikrangko Eighth Schedule-o ra·napchina uamang dabienga ine aganenga indiba angni nikani gitade uamang iani bidingo ma·mong sorkari baksa bilakbate agangrikna man·achim,” ine Jyrwa aganaha.

Iarangni bidingo Meghalaya a·dokba bilakbate ku·rangko on·na nanga aro India sorkariba manderangni jingjengatanirangna senge dongaigija ia kamrangko chu·sokatna nanga ine NESO-ni chairman parakataha.

Ia jingjengatanio bakko ra·anggipa dingtang dingtang dolrangara, KSU, HNYF, FKJGP aro uandakgipa dingtang dingtang dolrang ong·achim.

NGO-rangni jingjengatengmiting somoio maming so·sojengjeng ong·anirang dongjana gita ia jol gimikon chel·chakgipa sipai dolrangko donattokaha.

Get real time updates directly on your device, subscribe now.

Comments are closed.