TURA: Salesian ba Catholic Missionary-rangni North East India-ona sokbaaoni bilsi 100 gapaniko aro Don Bosco Jayanti-ko re·anggipa Mongolbar salo, Tura-ni Don Bosco College-o maniangaha aro ia manianio a·dokni Food, Civil Supplies & Consumer Affairs Minister James Pangsang K Sangma, mongsonggipa sokgipa ong·e bakko ra·angaha.
Ia manianio Tura-ni Bishop Rt Rev Andrew R Marak, West Garo Hills a·jani Deputy Commissioner Swapnil Tembe aro dingtang dingtang officer-rangba dongpae bak ra·angaha.
Ia tom·aniko ong·atanio a·dokni Cabinet Minister James PK Sangma, jinmana aganprakangengon, salgro salaram a·dokrangna aro mongsongbate Garo Hills-na Salesian-rangni dangdike on·anggipa kamrangni gimin gisik ra·atpilangenba, salgro salaram a·dokrango dingtanganiko ra·bana dakchakahani gimin Catholic missionary-rangko mittelpilangaha.
Ia tom·anio Tura-ni Bishop Rt Rev Andrew R Marak-ba jinmana aganprakengon, Garo Hills-o Catholic Mondoliko a·bachengatani gimin talataniko on·angenba, Catholic Missionary-rangni maikai rakbee kam ka·anichi Tura-o nambegipa Don Bosco College-ko kulina man·ahachim, uani bidingo manderangna gisik ra·atpilaniko on·angaha.
Ia salko manianio Don Bosco College-ni ‘BOSCOANS’ (2021-2022) aro ‘TRANSIENT’ – Journal (Science Stream) magazine-rangkoba oprake on·angjolaha.
Ia manianio Koch Folk Dance, Assamese Folk Dance aro A·chikrangni Wangala chrokanikoba college-ni chatro chatrirang chrok mesae mesokangaha.
Ia program-ko ong·atanio dongpae jinmana aganprakanggipa gipin manderangara, West Garo Hills a·jani Deputy Commissioner Swapnil Tembe, Don Bosco College-ni Principal Fr Bivan Rodriques Mukhim, Rev Alex Mathew, Don Bosco College-ni IQAC Coordninator Dr Barbara S Sangma aro gipinrang ong·a.
