SHILLONG: Meghalaya a·dokni Police headquarter bilrangko jakkalsretenga ine matnangenggipani bidingo da·o dipet Home department, maming report-rangko man·soa dongkujani gimin ian baditana kingking kakket ong·a aganna man·kujaenga ine a·dokni Home Minister Lahkmen Rymbui parakataha.
Iandake police-rangni kosako koborko on·ani kakket ong·genchimode, dos donggipa officer-rangni kosako sorkari nanga gita ja·kurangko de·gen ineba ua parakataha.
“Inquiry-ni bidingo songbadrango seaniko anga nikaha indiba iandakgipa report-rangko da·o dipet Home police department man·soa dongkuja. Iani bidingo anga DGP-ko gronge sing·sandiaha aro da·o dipet report-ko matchote tarikuja ine ua angna talataha. Report-ko taria matchotahaon una on·atgen indiba maikai iani report, kobor setimgiparangona sokangaha anga ma·sijaha,” ine ia report-ni gimin Rymbui aganaha.
Police headquarter-ni garirangko aro petrol-rangko jakkalanio niam gri dakenga ine matnanganirangko man·ahani gimin inquiry dakani ja·man report-ko tarianio bang·en ong·gija dakanirangko nikna man·ahachim.
Ia report-ko taria matchotkujaon, kobor setimgiparangona sokangahani gimin an·tangni suk ong·gijaniko parakatengon, “Angni report-o nikani gitade, ian ong·gija kam ka·aniko mesokja indiba bilko jakkalsretanisan ong·aia. Iani bidingo report-ko bakan matchotgnok aro je officer-rangkon iani bidingo matnangengachim, uamangni agananirangkoba knae ra·chengna nanggen,” ine Home Minister parakataha.
Iani report maikai kobor setimgiparangona sokangaha, iani giminba am·sandina nanggen ineba ua aganaha.
Basako report-ko department-ona sokatgen ine sing·on, “Kakketko sandina gita Police headquarter, dingtangmancha dolko songaha aro report-ko on·anide uamangni jakosa ong·aigen,” ine Rymbui parakataha.