SHILLONG: Meghalaya a·doko SSA skigiparangni dormaharangko bariatchina dabienggipani bidingo kamrangko niroke ka·na gita bakan a·dok sorkari, State Education Commission-ko songe donanggen.
Iako Meghalaya a·dokni Deputy Chief Minister Prestone Tynsong, Meghalaya SSA Schools Association (MSSASA)-ni dilgiparangna Budbar salo parakataha.
Tynsong-ni parakatani gitade, gong kror 272-mang ong·gipa India sorkarini Ad-hoc installment aro skanggipa installment-ko watatani bidingo a·dok sorkari, sanction order-ko man·soaha.
A·dok sorkarini gong kror 30.26-mang ong·gipa bakko ma·mong sorkari baksa meliatna gita da·o a·dok sorkari kam ka·engaha ineba Deputy Chief Minister parakataha.
SSA skulrango skigiparangna bangki dongkuenggipa dormaharangko on·na man·na gita ua an·tangba tangka paisarangko watatchina ma·mong sorkari baksa agangrikaha ineba Tynsong parakataha.
SSA skulrango skigiparangni dormahako on·na gita ‘Quarterly System’-ko ra·gatani bidingo janapatskaengon, ia 2022 bilsini July 21 tariko chanchirimgimin gita niamko ra·gatna Education, Planning aro Finance department-rang kamko ka·engaha ine Deputy Chief Minister parakataha.
SSA skigiparangna dormaharangko on·na gita ‘Quarterly System’-ko name ra·gatna gitade a·dok sorkariba tangka paisa chamaniko bariatskana nanggen ineba Tynsong parakataha.