TURA: West Garo Hills a·jani ning·o donggipa Dadenggre civil sub-division-ko dingtang district songchina dabitokengon, Sombar salo Dadenggre jolo donggipa dingtang dingtang NGO-rang, gital dake gital Dadenggre district-na ku·rangko on·angtaiaha.
Sombar salo, Dadenggre-ni GSU, FKJGP, AAYF aro FAF dolrang, dingtang Dadenggre district-ko songna nangengani gimin ku·rangko on·attokaha.
GSU Western Zone (North) Dadenggre-ni president Tengsan M Marak-ni parakatani gitade, Dadenggre civil sub-division-ko 1982 bilsion songahani gimin ian a·doko gitchambatsranggipa sub-division-rangoni damsa ong·enga indiba ia sub-division-ni ning·o da·o biaprang namen dal·ahani gimin sub-division-ni gita kamrangko ka·sokjaenga ine nikenba dingtang dingtang dolrang, 1999 bilsionin dingtang Dadenggre district-ko songe on·china dabitokengachim.
“Chinga 1999 bilsionin dingtang dingtang dolrang nangrime, dingtang Dadenggre district-na dabiengachim aro iani bidingo changni chang sorkarina aro dingtang dingtang dilgiparangna memorandum-rangkoba on·manahachim. Indita chang memorandum-rangko on·ani ja·manoba aro changni chang dilgiparangko gronge agangrikani ja·manoba chingni dabiani da·alonan be·en pil·kujaenga,” ine GSU Dadenggre-ni president, suk ong·gijaniko parakatenba, dingtang Dadenggre district-ko ta·raken songe on·china a·dok sorkariko didiataha.
Dingtang district-ko songchina gita Dadenggre jolo songdongenggipa manderangni dabianiko chu·sokate on·kujaengani gimin AAYF Dadenggre-ni secretary Pinon Marak-ba suk ong·gijaniko parakataha aro dingtang Dadenggre district-ko songe on·china sorkariko didiataha.
Dadenggre jolo songdongenggipa manderangni aro dingtang dingtang dolrangni Dadenggre district-na dabianiko chu·sokate on·kujaengani gimin FKJGP-ni secretary Walchang Sangma-ba suk ong·gijaniko parakataha aro iana Dadenggre-ni MLA James Sangma-ni kosako raken jegalaniko parakataha.
“Sorkariara manderangna aro manderangchi chalaienggipaan ong·achim indiba chingni MLA James Sangma, Dadenggre constituency-ni namgnina maming ku·rangko on·chipjaenga. Uni gimin Dadenggre jolrango namroro silroroaniko ra·bana gita chingna dingtang district-ko on·china chinga dabienga,” ine Sangma parakataha.