BAGHMARA: South Garo Hills a·jao Balkal A·sim Government Deficit UP skulni nokkingko bilsi 10-na skangan mikka balwa man·angahani gimin Sombar salo, ia skulni chatro chatrirang aro skigiparang, tarpauline pine skigiparangni salko maniangtokskaaha.
Koborko on·ani gitade, ia skulara South Garo Hills a·jani Mindikgre jolo donggipa skul ong·a aro ia skulo poraienggipa chatro chatrirang gimik sak 75-mang dongachim.
Songsalna kamko ka·enggipa Mindikgre songni Greneth Sangma-ni kobor ra·timgiparangna parakatani gitade, ia skulni bidingo ua changni chang Education department-na u·iatahachim indiba da·alonan ia skulko taridape on·ani dongkujaengani a·sel skulo poraienggipa chatro chatrirangsan ong·aigija skigiparangba neng·nikanirangko chagrongna nangtokengachim.
“Ia skulni nokkingko bilsi 10-na skangan mikka balwa man·angaha aro ia skul nokba be·gruna sie dongengahachim. Indita chang department-na u·iatani ja·manoba maming dakchakanirangko man·jae, ia skulo iandakgipa obostarangko chagrongna nangtokengaha,” ine Sangma parakataha.
Sangma-ni parakatani gitade, ia skulni gimin ua South Garo Hills a·jani DI baksa agangrikon, ia skulko taridapna gita ua Education department-ni official-rangna hisaprangko watatmanaha aro skul nokko bakan taridapgnok ine ku·rachakatahachim indiba da·o bilsi 10 batangpilengahaoba ia skul nokko taridape on·anirang dongkujaengachim.
“Ia skulo poraienggipa bi·sarang, a·gilsakni seng·aniko skie ra·na tikkele indita duk chake poraitokenga aro skigiparangba an·tangtangko on·kange kamrangko ka·tokpaenga,” ine Sangma parakataha.