SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni pringwal 3:00 bajio rim·na re·anganiara chanchininggija kam ka·aniko mesokani ong·aha aro police-rang bilko nangana bate jakkaljagenchimode uko sianiona sokatjawachim ine ia a·selni bidingo inquiry dakgipa commission-ni report-o parakaha.
“Angni nikani gitade, andalmiting somoio maming tarisamsoa gri police-rangni ja·ku de·aniara chanchininggija ja·ku de·ani gitasa ong·aha aro ia mandeko siaona sokatgijan ia kamko ka·na man·achim,” ine Sukrobar salo Assembly-ona ra·anggipa Inquiry Commission-ni report parakaha.
Inquiry commission-ni report-o parakani gitade, andalmiting somoio aro nangana bate bilko jakkale kamko ka·aniara Thangkhiew-ko tange rim·na police-rangni miksonganiko pe·ani ong·ahachim.
“Sianggipa mandeko police-rang tange rim·jahani gimin ian police-rangni orto gri ja·ku de·anisa ong·aha,” ine report-o parakaha.
Thangkhiew-ni nokko chadrapegipa police dol, kontagnimangna sengkuenba seng·bana on·chenge, sianggipa mande aro uni nokdangni kuturirangchi teargas grenade-ko goatgenchimode, nokni manderangko ong·katchina draatgnokchim aro unode sianggipa mandeko altuaen rim·na man·genchim aro uni nokdangni gipin manderangnaba naljokaniko on·na man·genchim ineba Inquiry Commission-ni report-o parakaha.
HNLC-ni gitcham general secretary-ni nokko chadrapeanio Thangkhiew-na agre nokni darangba maming saknaanirangko man·jaha ine police-rangni pa·sikaniara ra·chakna man·gijani ong·a ine janapatengon, “13-8-2021 tarikni pring 3 bajio sianggipa mandeko rim·na police-rangni uni nokko chadrapeaniara chanchininggija aro nangana bate bil jakkalaniko mesokani ong·aha aro iani a·selsa Cheristerfield Thangkhiew sina gita nangaha,” ine ia a·selko sandirokgipa Justice Vaiphei-ni report-o parakataha.
Indake ong·engon, police-rangna Inquiry commission-ni gita dingtangmancha ku·pattianirangkoba ia report-o on·angjolaha aro uan: (a) Nokni dosgri manderang saknaanirangko man·jana gita dos dakgipa manderangko walni somoio chadrapjachina. b) Walni somoirango operation ba chadrapanirangko dakenggipa sipairangna Night Vision Device (NVD)-rangko on·china. c) Jillarango donggipa nokrangko chadrapengon, sipai dolrang teargas grenade-rangko jakkalchina, d) Manderangni dongchakenggipa nokrangko chadrapanio dosgri manderangna saknaanirangko aro manderangna noksan ong·aniko ra·bajachina, e) Manderangni bilrangko mande ra·na gita police-rangna agan-skie on·china aro f) Jillarango donggipa nokrangko chadrapengon, manderangni janggi gimaaniko champengna man·na gita police dolrang baksa ambulance-rangko on·chapchina didiataha.