SHILLONG: Assam aro Meghalaya a·dokni simarango meligrikna man·jaenggipa biaprangko namatna gita a·dok damgnini soi ka·grikgipa Memorandum of Understanding (MoU)-ni bidingo a·dokni Chief Minister Conrad K Sangma aro Umroi-ni MLA George Lyngdoh-ni gisepo Sombar salo, Assembly-ni Autumn Session-o ding·chaogrike jera ra·aniko nikangna gita man·aha.
Assam aro Meghalaya a·dokni simarango meligrikgijaniko namatna gita skanggipa ja·ku de·anio songni manderang baksa agangrikchenggijasa a·dok damgnini sorkarirang, MoU-o soi ka·grikahani gimin da·o gnigipa bakode songni manderang baksa agangrikchenggenma ine Autumn Session-ni gnigipa salo, Umroi MLA George Lyngdoh-ni sing·doanina aganchakaniko on·angengon, a·dok damgni ia kamrangko ka·angkuna skangba pilak nangchakegipa dolrang baksa agangrikchenggen ine Chief Minister parakataha.
Skanggipa bakni MoU-o soi ka·grikna skangba, changni chang tom·anirangko aro manderang baksa agangrikchengesa ja·kuko de·ahani gimin Umroi MLA-ni agananiara manderangko dilsretna aro tol·e janapanisan ong·enga ineba Chief Minister aganaha.
Iandakgipa kattarangko janapjachina Umroi-ni MLA-ko didiangengon, ua press conference-o ong·ja indiba Assembly-osa ong·engako ma·sina nanga ine Chief Minister aganaha.
Iani bidingo sorkari, district council-rang, MDC-rang aro NGO-rang baksaba agangrikchengahachim ineba Sangma parakataha.
Chief Minister-ni iandakgipa kattarangna aganchakaniko on·angskaengon, a·dok damgnini soi ka·grikgipa MoU-ko district council, Hima Mylliem aro dingtang dingtang songni manderangba jegaltokenga aro Assembly-ni niamo pangchake membor-rangni kosako iandakgipa kattarangko agananiara kraani ong·ja ine Lyngdoh parakatskaaha.
Assam sorkari baksa gnigipa agangrikanio Assembly-koba bak ong·atgenma ineba Lyngdoh, a·dok sorkariko sing·doangaha.
Iana aganchakaniko on·angskaengon, mitam manderangde MoU-ni bidingo kusi ong·jaengnaba gnang indiba ian dingtang dingtang dolrang baksa agangrikchengja inede ong·jachim ine Chief Minister talataniko on·angenba, iani bidingo sorkari, MLA-rang baksaba agangrikanggen ine parakataha.