SHILLONG: Garobadha-oni Ampati-Zikzak-Mahendraganj aro Purakhasia gita Dalu-ona dakanggipa ramako taridapna gita gong kror 4.42 tangkarangko a·dok sorkari chamataha ine Bristibar salo, a·dokni Deputy Chief Minister aro PWD (Roads) Minister Prestone Tynsong u·iatenba, ia ramako National Highway (NH) dake tarina bakan ma·mong sorkarina proposal-ko on·atgen ine parakataha.
Assembly-ni Autumn Session-o ia ramani gimin Salmanpara-ni MLA Winnerson D Sangma-ni sing·anina aganchakaniko on·angengon, ia ramara Garo Hills-ni a·kawe jolrango mongsongbatgipa rama ong·engani gimin a·dok sorkari, ia ramako national highway dake tarina gita ma·mong sorkarina proposal-ko on·atna nangnikenga ine PWD (Roads) Minister parakataha.
“Garobadha-oni Dalu-ona dakanggipa ramani nosto ong·angengako nike a·dok sorkari, ia ramako taridapna gong kror 4.42-ko chamatmanaha aro gong kror 5.29 tangkarangko chamdape on·na miksongenga,” ine Tynsong aganaha.
Tynsong-ni parakatani gitade, ia km 98 ong·gipa ramako 2018 bilsiosan gong kror 250 tangkarang koros ong·e tarimanahachim indiba ia rama gita Bangladesh a·songona ro·ong salangenggipa truck garirang re·ruraengani a·sel ia rama ta·raken nosto ong·ahachim.
Ia ramani gimin chanchirimanio Rangsakona-ni MLA Zenith Sangma-ba bak ra·angpaengon, ia rama gita bostu salruraenggipa garirangna metric ton 12-kosan donaiachim indiba bostu salgipa garirang, metric ton 42-oni 48-mang ong·pile salruraengani a·sel rama ta·raken nosto ong·atako man·enga ine parakataha.
Ia rama gita truck garirangni simsakgija salengani a·sel bang·a manderangan siangna gita nangaha ineba ua, ia ramarango manderangna naljokaniko on·na gita rakgipa niamrangko donatchina sorkariko didiangaha.
Indake ong·engon, ia rama gita niam pe·e bostu salenggipa garirangni bidingo am·sandianirangko dakatna PWD (Roads) Minister ku·rachakangaha aro ramao manderangna naljokaniko on·na gitaba niamrangko donatna ku·rachakangaha.