SHILLONG: Meghalaya a·doko railway project-rangko chu·sokatchina ma·mong sorkari nangnikengoba, dingtang dingtang dolrang aro a·doko songdongenggipa manderang baksa chanchirimchenge manderangni nangnikanirangko a·dok sorkari ra·chenggen ine Sukrobar salo a·dokni Chief Minister Conrad Sangma parakataha.
Meghalaya a·doko km 22 ong·gipa Tetelia-Byrnihat rel rama aro km 108 ong·gipa Byrnihat-Shillong rel ramarangko tarina gita ma·mong sorkari on·ahachim indiba dingtang dingtang NGO-rangni jegalengani a·sel rel ramarangko tarina man·kujaengachim ine nikna man·a.
Iani bidingo Assembly-ni Autumn Session-o dingtang dingtang membor-rangni sing·anina agan-talataniko on·angengon, ia railway project-rangko ta·raken matchotatchina ma·mong sorkari ge·etanirangko on·engachim indiba dingtang dingtang neng·nikanirang dongani a·sel kamrangko ka·na man·kujaenga ine ua ma·mong sorkarina u·iataha ine Chief Minister parakataha.
“Jadokna skang angni Union Railway Minister-ko grongeani somoio ia railway project-rangko chu·sokatanio chagrongna nangenggipa neng·nikanirangko anga talate on·baaha. Ia railway project-rangko a·doko songdongenggipa manderangni namgninasa ra·gate on·engani gimin Meghalaya sorkari aro a·dokni manderang ia project-rangko ra·chakahaosa, kamrangko a·bachengatna ua angna aganatskaaha,” ine Chief Minister aganaha.
Tetelia-Byrnihat rel ramako gong kror 496 tangkarangchi tarina on·engachim indiba a·dokona niam gri napsrukanirangko champengna gita ILP-ko ra·gatkujaengani gimin dingtang dingtang dolrang, ia railway project-rangko raken jegalskaengachim.
Ia railway project-rangko sorkari chu·sokatna nangnikenga ine janapatengon, “Ia rel ramarangko chinga a·dokni manderang aro dingtang dingtang dolrang baksa chanchirimchengsa tarigen ine anga India sorkarina u·iatmanaha. Chinga kamrangko chu·sokatna nangnikenga indiba manderangni nangnikani gitasa kamko ka·na sikenga,” ine Sangma aganaha.
Tetelia-oni Byrnihat-ona taribagipa rel ramarang, Assam-chipakde matchotangengaha indiba Meghalaya a·dokode ia ramako tarina a·bachengatahaon dontongpilna nangaha ine janapatenmgon, Byrnihat-ona bostu salgipa rel garirangko ra·bana man·genchimoba uan a·dokna bang·a namgni ong·gen ine mitam dolrang baksade agangrikmanahachim ine Chief Minister parakataha.
“Bostu salgipa rel garirangnade songgigrikani dongachim indiba mande salgipa rel garirangkosa bang·en jegaltokenga. Manderangni gisiko ka·donganiko on·na gita Mendipathar railway station-o check point-ko songchina anga gitcham railway minister-ko didiatahachim,” ineba Sangma aganaha.
Ia railway project-rangko jegaltokengani gimin da·o dipet kamrangko aro hisaparangkoba dakkujaenga ineba Chief Minister aganaha.
Chief Minister-ni parakatani gitade, Tetelia-oni Byrnihat-ona aro Lailad-ona kingking rel ramako tarina survey-rangkode ka·manahachim.