NGH-ni Raja A·pal songo JNV-ko kulina pangchakaniko songa

TURA: North Garo Hills a·jani Raja A·pal songo Jawahar Navodaya Vidyalaya (JNV)-ko kulina gita Bristibar salo, a·dokni Chief Minister Conrad K Sangma, pangchakaniko songe on·angaha.
Ia JNV-ko rika matchotkujaskal, bi·sarang skie ra·sona man·na gita dingtangmancha iana ua gitcham skul nokkoba kulie on·angjolaha.
North Garo Hills a·jani skanggipa JNV-o kulina gita pangchakaniko songe on·angani somoio a·dokni Chief Minister, jinmana aganprakangengon, ia JNV-na skanggipa bako gong kror 36-na baten tangka paisarangko chamataha ine parakangaha.
Meghalaya a·doko lekka porako tang·doatna aro pilakni gitan namroro silroroaniko ra·bana uni MDA sorkari, kang·kare kam ka·enga ineba ua aganaha.
“An·chingni a·dok namroro silrorona gitade an·chingni dedrangnan skanggipa lekka porako aro bida budikon on·chengna nanggen aro iani giminsa chingni sorkari, lekka porako tang·doatna gita dingtang dingtang program-rangko a·bachengate on·aha. Iana dingtangmancha chinga Education Policy-koba a·bachengataha,” ine Sangma aganaha.
Batanggimin bilsibri atani gisepo uni sorkari, sorkarini dakchake on·enggipa skulrangna gong kror 1500 tangkarangko koros ka·aha ineba ia tom·anio Chief Minister parakataha.
North Garo Hills a·jana JNV-ko man·baanio Assembly-ni Deputy Speaker aro Resubelpara-ni MLA Timothy D Shira-ni jak donga ineba ua mittelpilaniko aganangaha.
Raja A·pal ramako tarina gita gong kror 10 tangkarangko sorkari chamataha aro ia gital biapo JNV-ko kuliahaode ian mongsonggipa rama ong·gnok ineba ia tom·anio Chief Minister parakataha.
Ru·uta bilsirangonin North Garo Hills a·jao JNV-ko kulichina gita dingtang dingtang dolrang dabitokengachim ine nikna man·a.