TURA: Dilgiparangko seokanio mande sakantini daitorangko aro electoral roll-rango biming segatani gamchataniko manderangna agan-talate on·na gita East Garo Hills a·jani dingtang dingtang biaprango Systematic Voter Education & Electoral Participation (SVEEP) program-rangko ong·atangaha.
Koborko on·ani gitade, ia program-rangko East Garo Hills a·jani ning·o donggipa damgittam Legislative Assembly Constituency (LAC)-rang, chong·motan Williamnagar Legislative Assembly, Songsak Legislative Assembly aro Rongjeng Legislative Assembly constituency-ni dingtang dingtang biaprangon ong·atangaha.
“Je polling station-rangon voter ba pu·ongiparang komiengachim, uandakgipa polling station-rango manderangko electoral roll-rango segatna, bilsi 18 gapgimin chadamberangko electoral roll-rango biming segatchina didina aro be·enni gita cholgri ong·gipa manderangkoba electoral roll-rango biming segatna miksonganio ia SVEEP program-rangko, damgittam Assembly constituency-ni dingtang dingtang biaprango ong·atangaha,” ine East Garo Hills a·jani Deputy Commissioner Jagdish Chelani, social media-o parakataha.
Aadhar card baksa nangchakgipa Election Photo Identity Card (EPIC)-rangko ra·china aro an·tangtangna on·gimin bilo pangchake dilgiparangko seokanio bak ra·jringchina gitaba ua a·jani manderangko didiataha.
