Aradonga-o Veterinary office-ni gital nokko rikchina ADE dabia

TURA: West Khasi Hills a·jani Aradonga songo donggipa Veterinary office-ni nok obosta namsrangjahani a·sel kam ka·giparang neng·nikanirangko chagrongna nangtokenga ine Association for Democracy & Empowerment (ADE) Aradonga regional unit parakatenba, ia gitcham office nokko pe·gale gitalko rikskachina sorkario dabiangaha.
ADE Aradonga regional unit-ni parakatani gitade, ia Veterinary office nokko batanggimin bilsi 10 ba bilsi 15-mangna maming taridape on·ani dongjani a·sel da·o ia nokni obosta namsrangjaengahachim aro ia noko chi, bijoli, bathroom, toilet aro uandakgipa nangchongmotgipa biaprangba dongjani a·sel manderang dongchakna aro kamrangko ka·na kragipa biap ong·jahachim.
“Uni gimin ia office nokko pe·galsrange gital nokko rikchina ba manderangni jakkalna nanggipa chu·gimik cholrang baksa ia nokko taridape on·skachina chinga didienga,” ine ADE Aradonga regional unit-ni dilgiparang, Shillong-o donggipa Animal Husbandry & Veterinary-ni Director-na sedoatgipa chittio parakataha.