New Delhi: Meghalaya-o election ong·na sepangrikrikbaengon, BJP sakgittam memborni top level central committee-ko songe, BJP-ni national president J P Nadda-ko grongna gita re·angaha.
Kobor man·soani gitade, party-ni central leadership ba dilgiparang, sakgittam memborni panel-ko election-ko chu·gimik kamko nirokchina donataha. Panel-ko election-ni kamko nirokchina ge·etaha. Panel-o BJP-ni gital seokgipa North East-ni coordinator Sambit Patra, joint coordinator Rituraj Sinha aro state in-charge M Chuba Ao- uamang donga.
Haida Diwali-ni ja·man Nadda, Meghalaya-ona wenbanaba gnang. Indiba salgro-salaramni gipin a·dokrang jekai Tripura aro Nagaland-ona re·angama re·angjawa, iani gimin talkujaenga.
Minggipin Meghalaya a·doko NPP-ni dilenggipa sorkari baksa bakrimaoni ong·katna BJP, aganaha, indiba cabinet-o saksamangmang donggipa BJP-ni dilgipa Sanbor Shullai-de, NPP-na chakangkuna aganskaha. Chief Minister Conrad Sangma-ni kosako cha·bokani mamlao matnangani ja·man BJP-ni Meghalaya in-charge M Chuba Ao, NPP baksa bakrimaoni ong·katna chanchigen ine aganaha.
Indake ong·engon state unit president Ernest Mawrie-ko ogranisation-ni kamrango gisik on·china ge·etskaha. Iarangni gisepon Mawrie, an·tangba West Shillong assembly constituency-oni election susanaba donga.
Meghalaya-o batanggimin bilsi 2018-o, Nalin Kohli-ni state in-charge ong·mitingo BJP, ge·gni seat-ko man·aha.
Ia changba BJP national vice president M Chuba Ao-ni dilanio party, bilake susagrikna tarienga. Batanggimin assembly election-o BJP dolsan ong·e susaahachim indiba ja·man NPP baksa bakrimaha.
