SHILLONG: Meghalaya a·doko National People’s Party (NPP)-chi dilenggipa Meghalaya Democratic Alliance (MDA) sorkario Bharatiya Janata Party (BJP)-ba bakrimangkugen ine a·dokni BJP Minister Sanbor Shullai parakataha.
MDA sorkariko tangka paisa jakkalsretanina aro kamrangko ka·sretanina matnangtokengani gimin NPP-chi dilenggipa MDA sorkario bakrimaniko bakan watgnok ine jasa skang BJP-ni Meghalaya on-charge M Chuba Ao-ni parakatani ja·man da·o Meghalaya a·doko BJP-ko dilenggipa aro Minister ong·enggipa Sanbor Shullai, ia kattarangko parakatskaaha.
“MDA sorkario bakrimaoniko BJP watkujawa aro term matchotaona kingkingan MDA-o bakrimangkugen,” ine Shullai, kobor ra·timgiparangna parakataha.
Da·o iandakgipa somoio MDA sorkario bakrimaniko watgenchimode BJP-na chakpaenggipa manderangni gisepo ong·gija chanchianirang ong·katgen ineba ua aganaha.
MDA sorkarini tangka jakkalsretani aro ong·gija dake kam ka·anirangko Enforcement Directorate (ED) aro Central Bureau of Investigation (CBI)-chi sandirokatna gita sakkirangko chimongenga ine September jani a·bachengachibaraon, BJP-ni Meghalaya in-charge M Chuba Ao, MDA sorkario bakrimaniko jasani gisepon watgnok ine parakatahachim.
Meghalaya a·doko NPP-chi dilenggipa Meghalaya Democratic Alliance (MDA) sorkario bakrimaoniko BJP ra·pilna tik ka·manaha aro iani bidingo ta·raken ja·kuko de·china ua ma·mongni BJP dilgiparangko didiataha ine BJP-ni MLA AL Hek-ba parakatahachim.
Indake ong·engon, Meghalaya a·doko BJP-ko dilenggipa gipin dilgiparang baksa agangrikchenggijasa BJP-ni dilgipa M Chuba Ao, MDA sorkario bakrimaniko watna tik ka·aha ine BJP-ni state president Ernest Mawrie parakatskaaha.