SHILLONG: Shillong songjinmani Mawdiangdiang-o rikenggipa gital Assembly building-ni protchong ia bilsini a·bachengachibara be·gropani a·sel kamrangko dontongatani ja·man da·o kamrangko re·baenggipa November jani bon·angachibarasa a·bachengpiltaignok.
Bristibar salo sorkari official saksani parakatani gitade, da·o dipet ia Assembly building-ni be·gropgipa jabolrangko rongtalatengkua.
Be·gropgipa jabolrangko November 15 tarikni gisepode rongtalatna ka·dongenga ine janapatengon, ia jabolrangko chu·gimik rongtalatani ja·manosa badia kamrangko a·bachengatna nanggen, ukode chanchina man·gen ine sorkari official parakataha.
Indake ong·engon, ia gital Assembly building-ni protchong-na noksako gital dake saltaina a·bachengataha aro ia gital noksako bakan matchotna ka·dongenga ineba kobor on·aha.
Ia gital Assembly building-ni protchong be·gropani ja·man, Indian Institute of Technology (IIT) Guwahati-ni ku·pattianio pangchake a·dok sorkari, da·o gital protchongnade cheng·kalgipa bosturangko jakkalna tik ka·skaahachim.
Ia gital Assembly nokko ia bilsini December jaon matchotatna gita nisanko donahaoba, ia obosta ong·ahani a·sel da·o somoiko ra·dodapna nanggnok ineba sorkari official parakataha.
Ia gital Assembly building-ni metric ton 4000-na batgipa protchong, May 22 tarik pringwalo be·gruahachim aro ia protchong be·gruani ja·man, dingtang dingtang political dolrang, NGO-rang aro a·doko songdongenggipa manderangba, ia nokko rikani bidingo sorkariko sing·doenba, CBI-chi inquiry-ko dakchina dabitokahachim.
Meghalaya a·dokni gitcham Assembly building-ko bilsi 20-mangna skang wa·al kamchipahachim aro untalan a·doktangni Assembly nok dongkujaengachim.
Da·o ia gital Assembly building-ko matchotangengahachim indiba protchong be·grutaiahani a·sel Assembly building-ko matchotna somoi nangdapskaengahachim.