TURA: West Garo Hills a·jani Gambegre C&RD Block-ni ning·o donggipa Chigitchakgre songo Bee Keeping ba bija jilani bidingo agan-skie on·na gita salbongani training program-ko ong·atangaha aro ia program-ko Sukrobar salo, dingtangmancha bak ra·giparangna bija jilani bosturangko suale on·angenba matchotataha.
Ia training program-ko Tura-ni District Commerce & Industries Centre (DCIC), NEHU Tura campus baksa bakrime ong·atangaha aro ia program-ko ong·atna gita tangka paisarangko Raipur Chattisgarh-ni NIBSM dakchake on·angskaaha.
Ia program-ko matchotatani salo, NEHU Tura campus-ni Campus-in-Charge Prof Sujata Gurudev, mongsonggipa sokgipa ong·e jinmana aganprakangengon, Chigitchakgre songo nokdang ge·antian bija jilna a·bachenganiko nikna ua Nokmako aro songni manderangko mittelpilangaha.
Garo Hills-ni bija bitchiara nambatsranggipa rokom ge·sa ong·a ine janapatengon, ian manderangna tangka paisana kamaina aro jolo songdongenggipa manderangni janggi tangani gadangko tang·doatna dakchakani ong·gen ine Prof Gurudev parakataha.
Song damsako bijani song ong·atna aro mikkangchi ia songko manderangni rochakgipa biap ong·atna gita NEHU, song damsako deragatenba, ia songna nanga gita tangka paisarangko dakchake on·gen ineba Prof Gurudev parakataha.
Ja·mano ua seokgimin manderangna bija jilchakani bakosrangkoba suale on·ataha.
Ia program-ko ong·atanio dongpae jinmana aganprakanggipa gipin manderangara, NEHU Tura Campus-ni ning·o donggipa Incubation Centre-ni Nodal Officer Dr R Sasikumar, Tura DCIC-ni Functional Manager aro Apiculture Mission-ni Nodal Officer Frederick A Sangma, Chigitchakgre songni Nokma Lithin Ch Marak aro gipinrang ong·a.
Gambegre block-o bija jilaniko skie on·a, bija jilchakani bosturangko suale on·jola
Date:
Share post:
