SHILLONG: Meghalaya a·dokni chief minister ong·na man·genchimoba ba Opposition dolo asongna nanggenchimoba kusi ong·aigen ine Sombar salo, Meghalaya Pradesh Congress Committee (MPCC)-ni president Vincent H Pala parakataha.
An·tangko ua chief minister-ni candidate dake donsoengama ine sing·anina aganchakaniko on·angengon, election-na skang Congress dol, chief minister-ni gimin chanchiani dongrongjani gimin ua an·tangko chief minister-ni candidate ine chanchiani dongja ine Pala parakataha.
“Indiba cholko man·genchimode anga CM ong·na kusi ong·aigen aro opposition-o asongeba anga manderangna dangdike on·angkuna kusi ong·aigen. Dilgipa sakantian politics-ni kamo dal·rorona skani dongaia,” ine MPCC-ni president aganaha.
Iani bidingo toe janapatengon, seokako man·gipa MDC-ba executive membor ba chief executive membor ong·na skani dongaigen aro apsan daken MLA-rangba minister ong·na skani dongaia ine Pala aganaha.
Changgittamna Shillong-ni Lok Sabha MP ong·enggipa Vincent Pala, ia chango skanggipa changna Sutnga-Saipung constituency-oni susae a·dokni politics-ona re·bana siengahachim aro ia chango ua Sutnga-Saipung constituency-o TMC-ni MLA Shitlang Pale baksa susagrikna siengachim ine nikna man·a.
Pala-ni aganani gitade, da·o dipet ua uni constituency-o name dakenga aro batanggimin somoirangoba ua Lok Sabha-ni Sutnga-Saipung constituency-o chegipa ong·ahani gimin MLA election-oba chegipa ong·na ka·dongenga.
