SHILLONG: Shillong-ni College of Teachers Education (CTE)-na North Eastern Council (NEC)-ni dakchake on·anichi rikdapgipa nok, RUSA-ni ning·o gital rikgipa auditorium aro gipin nokrang baksana CTE-ona tarianggipa ramako Bristibar salo, a·dokni Chief Minister Conrad K Sangma, do·ga oe on·angaha aro ia nokrangko do·ga ona gita program-ko ong·atanio a·dokni Deputy Chief Minister Prestone Tynsong, Education-ni Commissioner & Secretary BDR Tiwari aro gipin official-rangba dongpae bak ra·angaha.
Ia tom·aniko ong·atanio a·dokni Chief Minister, jinmana aganprakangengon, bang·a chatro chatrirangan ia college-o napna gita seat-rangko sandiengoba man·tokjaengani gimin ia college-ko dal·batatna nangao ga·akaha aro da·alo ia college-o nokrangko rikdape on·na man·ahani gimin ian ia college-o poraina sikenggipa chatro chatrirangna bang·a dakchakani ong·gnok ine parakangaha.
A·doko lekka porako tang·doatanian sorkarini mongsonggipa daitorangoni mingsa ong·a ine gisik ra·attaianiko on·angengon, lekka porako namdapatanio dingtang dingtang neng·nikani aro ra·bianirangko sorkari chagrongna nangenga aro ia neng·nikanirangko bakande namatna man·jawa ine Chief Minister parakataha.
A·ningni dingtang dingtang bosturangoniko gile man·enggipa tangka paisarangko sorkari, lekka porako namdapatani kamrangna jakkalenga ineba Chief Minister parakataha.
Sorkarini chamgimin tangka paisani gitasa dingtang dingtang department-rangko namdapatna gita kamko ka·enga ine janapatengon, mikkangchiba namnamgipa skigiparangko ong·katatna gita name aro rakbate kamrangko ka·angkuchina gita ua Shillong CTE-ni skigiparangko aro dilgiparangko didiangaha.
